एजेन्सी, १२ जेठ । दक्षिण अमेरिकी मुलुक चिलीको उत्तरी भागमा सोमबार ६.९ म्याग्निच्युडको शक्तिशाली भूकम्प गएको छ। अमेरिकी भूगर्भ सर्वेक्षण का अनुसार, अटाकामा मरुभूमि क्षेत्रमा पर्ने कालामा सहर नजिकै केन्द्रविन्दु भएर भूकम्प गएको हो।

भूकम्पको केन्द्रविन्दु जमिनको सतहबाट करिब १०० किलोमिटर (६३ माइल) गहिराइमा रहेको थियो। भूकम्पको धक्का अरिका, तारापाका, एन्टोफागास्टा र अटाकामा क्षेत्रहरूमा कडा रूपमा महसुस गरिएको थियो।

चिलीको राष्ट्रिय विपद् रोकथाम तथा प्रतिक्रिया सेवाले भूकम्पका कारण हालसम्म कुनै पनि मानवीय वा ठूलो भौतिक क्षतिको विवरण प्राप्त नभएको जनाएको छ। साथै, समुद्रमा सुनामी आउने जोखिम नरहेको समेत अधिकारीहरूले स्पष्ट पारेका छन्।

विश्व इतिहासमै अहिलेसम्म रेकर्ड गरिएको सबैभन्दा शक्तिशाली भूकम्प पनि चिलीमै गएको थियो। सन् १९६० मा चिलीको दक्षिणी सहर भाल्डिभियामा ९.५ म्याग्निच्युडको भूकम्प जाँदा ९ हजार ५०० जनाको मृत्यु भएको थियो। यस्तै, सन् २०१० मा ८.८ म्याग्निच्युडको भूकम्प र त्यसपछि आएको सुनामीका कारण ५२० भन्दा बढी मानिसले ज्यान गुमाएका थिए।

आजको भूकम्प शक्तिशाली भए पनि गहिराइ धेरै भएका कारण ठूलो क्षति हुनबाट जोगिएको प्रारम्भिक अनुमान गरिएको छ। यद्यपि, प्रशासनले सर्वसाधारणलाई सतर्क रहन आग्रह गरेको छ।