लंका प्रिमियर लिगका लागि तीन नेपाली क्रिकेटर अनुबन्धित: सन्दीप, दीपेन्द्र र कुशल छानिए

काठमाडौँ, १८ जेठ । नेपाली राष्ट्रिय क्रिकेट टोलीका तीन जना प्रभावशाली खेलाडीहरू श्रीलंकाको प्रतिष्ठित फ्रेन्चाइज क्रिकेट प्रतियोगिता ‘लंका प्रिमियर लिग’ (एलपीएल) का लागि अनुबन्धित भएका छन्।

प्रतियोगिताका लागि भएको ड्राफ्टमार्फत लेग स्पिनर सन्दीप लामिछाने, अलराउन्डर दीपेन्द्र सिंह ऐरी र ओपनर कुशल भुर्तेल छानिएका हुन्।
यसपटक दुई फरक टोलीले नेपाली खेलाडीहरूलाई आफ्नो टिममा समेटेका छन्। जसअनुसार जाफ्ना किंग्सले सन्दीप लामिछाने र दीपेन्द्र सिंह ऐरी दुवैलाई अनुबन्ध गरेको छ। सन्दीप २० हजार अमेरिकी डलर (करिब ३० लाख नेपाली रुपैयाँ) मा अनुबन्धित भएका छन् भने दीपेन्द्र १५ हजार अमेरिकी डलर (करिब २२ लाख ५० हजार नेपाली रुपैयाँ) मा अनुबन्धित भएका हुन्।
त्यसैगरी, अर्को टोली कोलम्बो क्याप्सले कुशल भुर्तेललाई १५ हजार अमेरिकी डलर (करिब २२ लाख ५० हजार नेपाली रुपैयाँ) मा आफ्नो टिममा भित्र्याएको छ।

अन्तर्राष्ट्रिय फ्रेन्चाइज लिगहरूमा नेपाली खेलाडीहरूको माग बढ्दै जाँदा एकैपटक तीन खेलाडी प्रतिष्ठित लंका प्रिमियर लिगमा पर्नुलाई नेपाली क्रिकेटका लागि सुखद उपलब्धि मानिएको छ। यसअघि पनि सन्दीप र दीपेन्द्रले विभिन्न विदेशी लिगहरू खेलिसकेका छन्।

प्रतियोगिताको मिति र विस्तृत खेल तालिका भने केही समयपछि सार्वजनिक हुने आयोजकले जनाएको छ।