१६ वर्षपछि नकआउटमा स्पेनको सुखद पुनरागमन, अस्ट्रियालाई हराउँदै अन्तिम १६ मा प्रवेश
लस एन्जलस । पूर्व विश्वविजेता स्पेन फिफा विश्वकप २०२६ को अन्तिम १६ मा प्रवेश गरेको छ। अमेरिकाको लस एन्जलस स्टेडियममा शुक्रबार भएको खेलमा अस्ट्रियालाई ३–० को फराकिलो गोल अन्तरले पराजित गर्दै स्पेनले नकआउट चरणमा आफ्नो स्थान सुरक्षित गरेको हो।
स्पेनका लागि यो जित विशेष अर्थपूर्ण रहेको छ। सन् २०१० मा दक्षिण अफ्रिकामा भएको विश्वकपको उपाधि जितेयता स्पेनले विश्वकपको नकआउट चरणमा कुनै पनि खेल जित्न सकेको थिएन। यो १६ वर्ष लामो खडेरीलाई समाप्त पार्दै स्पेनले पुनः एकपटक आफूलाई उपाधि दाबेदारको रूपमा उभ्याएको छ।
ओयार्जाबालको ‘ब्रेभ’ प्रदर्शन
स्पेनको जितमा स्टार फरवार्ड मिकेल ओयार्जाबालले नायकको भूमिका निर्वाह गरे। उनले टोलीका लागि दुई महत्वपूर्ण गोल गरे। खेलको ३६औँ मिनेटमा डिफेन्डर मार्क कुकुरेलाको उत्कृष्ट पासलाई सदुपयोग गर्दै ओयार्जाबालले गोल गरी स्पेनलाई १–० को सुरुवाती अग्रता दिलाएका थिए।
दोस्रो हाफमा पनि स्पेनले अस्ट्रियामाथि दबाब कायम राख्यो। खेलको ६६औँ मिनेटमा अलेक्स बाएनाको सटिक क्रसमा पेड्रो पोरोले हेडमार्फत गोल गर्दै स्पेनको अग्रता दोब्बर बनाए। अस्ट्रियाको फितलो रक्षापंक्तिको फाइदा उठाउँदै स्पेनले लगातार आक्रमण जारी राखेको थियो।
खेलको अन्त्यतिर ८९औँ मिनेटमा पुनः मार्क कुकुरेलाकै सटिक पासमा ओयार्जाबालले व्यक्तिगत दोस्रो गोल गरेपछि स्पेनले ३–० को सहज र सानदार जित सुनिश्चित गर्यो।
ऐतिहासिक उपलब्धिको खोजीमा स्पेन
सन् २०१० पछि विश्वकपका पछिल्ला संस्करणहरूमा स्पेनको प्रदर्शन अपेक्षाअनुसार हुन सकेको थिएन। कहिले समूह चरण त कहिले प्रिक्वाटरफाइनलबाटै बाहिरिँदै आएको स्पेनले यसपटक भने सन्तुलित र आक्रामक खेल पस्किएको छ।
अस्ट्रियाविरुद्धको यो जितले स्पेनका खेलाडीहरूको मनोबल उच्च बनाएको छ। अब अन्तिम १६ मा स्पेनको भिडन्त कुन टोलीसँग हुनेछ भन्ने तय हुन बाँकी छ। पराजित अस्ट्रियाको लागि भने यो हारले विश्वकप यात्रामा कठिन चुनौती थपिदिएको छ।
