एजेन्सी, १९ असार । इरानका दिवंगत सर्वोच्च नेता अयातुल्ला अली खामेनीको अन्त्येष्टि कार्यक्रमको राष्ट्रिय तयारी भइरहेका बेला लामो समयदेखि सार्वजनिक रूपमा नदेखिएका इरानको अर्धसैनिक क्रान्तिकारी गार्डका प्रमुख जनरल अहमद वाहिदी अचानक देखा पर्नुभएको छ।

इरानी राज्य सञ्चारमाध्यमहरूले सार्वजनिक गरेका तस्बिर र भिडियो फुटेज अनुसार जनरल वाहिदी तेहरानमा आयोजित अन्त्येष्टिसम्बन्धी उच्चस्तरीय बैठक तथा श्रद्धाञ्जलि सभाहरूमा सक्रिय रूपमा सहभागी हुनुभएको हो।

गत फेब्रुअरी ८ पछि सार्वजनिक रूपमा नदेखिएका जनरल वाहिदीको यस पछिल्लो उपस्थितिलाई अन्तर्राष्ट्रिय भू-राजनीतिक विश्लेषकहरूले विशेष चासोका साथ हेरेका छन्। अमेरिकासँगको सम्भावित कूटनीतिक वार्तामा इरानको तर्फबाट कडा अडान तय गर्न जनरल वाहिदी निकै प्रभावशाली भूमिकामा रहनुभएको बुझिएको छ। उहाँलाई नयाँ सर्वोच्च नेता अयातुल्ला मोजताबा खामेनीसँग प्रत्यक्ष सम्पर्कमा रहेका सीमित सैन्य अधिकारीहरूमध्ये एक मानिन्छ।

नयाँ सर्वोच्च नेता मोजताबा गत फेब्रुअरी २८ मा भएको इजरायली हवाई आक्रमणमा घाइते हुनुभएको थियो, सोही आक्रमणमा ८६ वर्षीय अयातुल्ला अली खामेनीको मृत्यु भएको दाबी गरिएको छ।

तेहरानस्थित हुसिनियाह परिसरमा राखिएको दिवंगत नेता खामेनीको कफिनमा रातो ट्युलिप फूल सजाइएको छ भने कफिनमाथि शिया समुदायमा अन्यायपूर्ण मृत्यु र प्रतिशोधको प्रतीक मानिने ‘या हुसेन’ लेखिएको सेतो सुलेखनसहितको रातो झण्डा ओढाइएको छ। बिहीबार राति तेहरानको केन्द्रीय क्षेत्रमा आयोजित शोकसभामा शोकाकुल परिवारजन र शुभचिन्तकहरूले कफिनतर्फ स्कार्फ र अन्य सामग्री फ्याँकेर शिया धार्मिक परम्परा अनुसार श्रद्धाञ्जलि व्यक्त गरेका थिए।

इरान सरकारले आगामी शनिबारदेखि दिवंगत नेता खामेनीको देशव्यापी अन्त्येष्टि कार्यक्रम सुरु गर्ने तयारी गरेको छ। उहाँको पार्थिव शरीरलाई अन्तिम श्रद्धाञ्जलिका लागि इरान र छिमेकी राष्ट्र इराकका विभिन्न सहरहरूमा लगिने कार्यतालिका तय गरिएको छ।

अन्त्येष्टि जुलुस तेहरानको ग्रान्ड मोसल्लाबाट सुरु हुनेछ। चार दशकसम्म पश्चिम विरोधी कडा कूटनीतिक नीति अख्तियार गर्दै इरानको नेतृत्व गर्नुभएका खामेनीप्रति अन्तिम श्रद्धा अर्पण गर्न लाखौँको सङ्ख्यामा शोकाकुल नागरिकहरू सहभागी हुने सरकारी अधिकारीहरूले अपेक्षा गरेका छन्।