झापामा नवविवाहित युवतीको शङ्कास्पद मृत्यु : निष्पक्ष छानबिनको माग गर्दै माइती पक्षद्वारा दबाब

काठमाडौँ, साउन १२ । झापाको भद्रपुर नगरपालिका १०, चन्द्रगढीस्थित पोखरेल टोलमा एक नवविवाहित युवती आफ्नै घरमा मृत अवस्थामा फेला परेकी छन् । नौ महिनाअघि मात्रै विवाह बन्धनमा बाँधिएकी ती युवतीको मृत्युलाई माइती पक्षले ‘शङ्कास्पद’ भन्दै निष्पक्ष छानबिन र दोषीमाथि कानुनी कारबाहीको जोडदार माग गरेका छन् ।

जिल्ला प्रहरी कार्यालय झापाका सूचना अधिकारी एवं प्रहरी नायब उपरीक्षक (डीएसपी) रञ्जन अवाका अनुसार, चन्द्रगढी निवासी प्रसिल कोइरालासँग वैवाहिक सम्बन्धमा रहेकी ती युवती गत सोमबार राति करिब ११:४५ बजे घरभित्रै झुन्डिएको अवस्थामा फेला परेकी थिइन् ।

घटनाको प्रकृतिलाई लिएर असन्तुष्ट बनेका माइती पक्ष र स्थानीय बासिन्दाहरू मंगलबार बिहानै जिल्ला प्रहरी कार्यालय पुगेका थिए । उनीहरूले यो घटना सामान्य आत्महत्या मात्र नभई सुनियोजित हुनसक्ने आशङ्का व्यक्त गर्दै प्रहरी प्रशासनसमक्ष सत्यतथ्य छानबिनको माग राखेका छन् ।

मृतकको शवलाई पोस्टमार्टमका लागि प्रादेशिक अस्पताल भद्रपुर लैजाने तयारी गरिए पनि माइती पक्षले त्यसमा असहमति जनाएपछि थप परीक्षणका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ ।

प्रहरीले घटनाको गम्भीरतालाई ध्यानमा राख्दै सुक्ष्म अनुसन्धान सुरु गरिसकेको जनाएको छ । डीएसपी अवाका अनुसार, “घटनास्थलको वस्तुस्थिति, मृतकको पोस्टमार्टम रिपोर्ट, फरेन्सिक प्रमाण र अन्य प्राविधिक विश्लेषणका आधारमा घटनाको यथार्थ विवरण चाँडै सार्वजनिक गरिनेछ ।”

प्रहरीले घटनाअघि भएका गतिविधि र सम्बन्धित व्यक्तिहरूसँग पनि सोधपुछ गरिरहेको बताएको छ । नवविवाहित युवतीको अकाल मृत्युले स्थानीयस्तरमा समेत आक्रोश र चिन्ता पैदा गरेको छ ।