पहिरोले तीन सातादेखि तातोपानी नाका ठप्प, अर्बौँको सामान बाटोमै अलपत्र

काठमाडौँ, २३ साउन । नेपाल र चीनबीचको वैदेशिक व्यापारको प्रमुख ‘लाइफलाइन’ मानिने तातोपानी नाका विगत तीन सातादेखि पूर्ण रूपमा अवरुद्ध भएको छ । अविरल वर्षासँगै आएको पहिरोले सडक सञ्जाल छिन्नभिन्न पारेपछि यो नाका हुँदै हुने आयात र निर्यात दुवै ठप्प भएको हो ।

तातोपानी भन्सार कार्यालयका प्रमुख भन्सार अधिकृत दीपेन्द्रप्रकाश गिरीका अनुसार नाका बन्द हुँदा दुई देशबीचको वैदेशिक व्यापारमा गम्भीर असर परेको छ । “विभिन्न ठाउँमा खसेको पहिरोका कारण सडक अवरुद्ध छ, जसले गर्दा चीनतर्फबाट सामान बोकेर आएका मालवाहक कन्टेनरहरू नेपाल भित्रिन पाएका छैनन्,” गिरीले भन्नुभयो ।

नाका ठप्प हुँदा लत्ताकपडा, इलेक्ट्रोनिक्स सामान र मेसिनरी पाटपुर्जा बोकेका कन्टेनरहरू सीमापारि नै रोकिएका छन् । सडक खुलाउने प्रयास भइरहे पनि भौगोलिक विकटता र निरन्तरको वर्षाका कारण मर्मत कार्यमा चुनौती थपिएको छ । प्रमुख भन्सार अधिकृत गिरीका अनुसार सडक कहिलेसम्म सञ्चालनमा आउँछ र व्यापार कहिलेदेखि सुचारु हुन्छ भन्ने विषयमा अहिलेसम्म कुनै निश्चित टुङ्गो लाग्न सकेको छैन ।

लामो समयदेखि नाका बन्द हुँदा व्यवसायीहरूले ठूलो आर्थिक नोक्सानी बेहोर्नुपरेको छ भने सरकारी राजस्व सङ्कलनमा समेत नकारात्मक प्रभाव परेको छ । तातोपानी नाका पटक–पटक प्राकृतिक प्रकोपको निशानामा पर्दा नेपालको उत्तरी व्यापारिक मार्ग सधैँ अनिश्चित बन्ने गरेको छ ।