काठमाडौँ, १७ भदौ । सङ्घीय संसद् प्रतिनिधिसभाको बैठक आज दिउँसो १:०० बजे बस्दैछ। आजको बैठकमा मुख्य आकर्षणका रूपमा सभामुख डोलप्रसाद अर्यालले भोटेकोशी बाढी र त्यसले निम्त्याएको अकल्पनीय क्षतिबारे ‘विशेष प्रस्ताव’ प्रस्तुत गर्नुहुने सम्भावित कार्यसूची रहेको छ।

सभामुख अर्यालले प्रस्तुत गर्ने विशेष प्रस्तावमा गत भदौ १० गते भोटेकोशी र त्रिशूली नदीमा आएको बाढीका कारण रसुवाको टिमुरे, स्याफ्रुबेँसी, बेत्रावती, नुवाकोटको त्रिशूली बजार र देवीघाट लगायतका क्षेत्रमा भएको ठुलो मानवीय र भौतिक क्षतिप्रति गहिरो दुःख व्यक्त गरिनेछ।

संसद् सचिवालयका अनुसार उक्त प्रस्तावमा बाढीमा परी ज्यान गुमाएका स्वदेशी तथा विदेशी नागरिकहरूप्रति श्रद्धाञ्जली अर्पण गर्दै बेपत्ताहरूको खोजी र घाइतेहरूको शीघ्र स्वास्थ्य लाभको कामना गरिनेछ। साथै, घरबारविहीन भएकाहरूको उचित व्यवस्थापनका लागि सरकारको ध्यानाकर्षण गराउँदै शोकसन्तप्त परिवारजनप्रति समवेदना प्रकट गर्ने कार्यसूची छ।

प्रतिनिधिसभाको बैठक बस्नुअघि आज दुईवटा महत्वपूर्ण संसदीय समितिका बैठकहरू समेत बोलाइएको छ:
१. अन्तर्राष्ट्रिय सम्बन्ध र पर्यटन समिति : बिहान ९:३० बजे बस्ने यस समितिको बैठकमा रसुवा बाढी र पहिरोका कारण नेपालको पर्यटन क्षेत्रमा परेको गम्भीर प्रभाव र आगामी चुनौतीका बारेमा छलफल हुनेछ।
२. विधायन व्यवस्थापन समिति : दिउँसो १२:१५ बजे बस्ने यस समितिको बैठकमा ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३’ माथि दफावार छलफल गर्ने कार्यसूची रहेको छ।

भोटेकोशीको विनाशकारी बाढीले मुलुकको पूर्वाधार र जनधनमा पुर्‍याएको क्षतिलाई संसद्ले उच्च प्राथमिकतामा राखेर छलफल अघि बढाउन लागेको हो।