काठमाडौँ — यूईएफए नेसन्स लिगअन्तर्गत समूह ‘ए’का खेलमा फ्रान्स र इटालीले महत्वपूर्ण जित हात पारेका छन्। फ्रान्सले बेल्जियमलाई ४–१ तथा इटालीले टर्कीलाई ३–१ गोलअन्तरले पराजित गरेका हुन्।

बेल्जियमविरुद्धको खेलमा फ्रान्सले खेलको अन्तिम १३ मिनेटमा चार गोल गर्दै उत्कृष्ट पुनरागमन गरेको हो। डोडी लुकबाकियोले रोमियो लाभियाको लामो पासमा गोल गर्दै बेल्जियमलाई अग्रता दिलाएका थिए।

फ्रान्सका डेजिरे डुएले गोल गर्दै खेल बराबरीमा ल्याए। त्यसपछि रयान चेर्कीले गोल गर्दै फ्रान्सलाई २–१ को अग्रता दिलाए। माइकल ओलिसेले त्यसपछि लगातार दुई गोल गर्दै फ्रान्सको जित ४–१ बनाए।

यस जितसँगै फ्रान्स चार खेलबाट १० अंक जोड्दै समूह ‘ए१’को शीर्ष स्थानमा रहेको छ। बेल्जियम ६ अंकसहित तेस्रो स्थानमा छ। ओलिसेले सन् २०२६ मा फ्रान्सका लागि १६ खेलमा १७ गोलमा प्रत्यक्ष योगदान गरिसकेका छन्।

यस्तै, समूहकै अर्को खेलमा इटालीले टर्कीलाई ३–१ ले हराउँदै तालिकामा दोस्रो स्थानमा उक्लिएको छ।

इटालीका जियानलुका स्कामाकाले २६औँ मिनेटमा गोल गर्दै टोलीलाई सुरुआती अग्रता दिलाएका थिए। दोस्रो हाफमा टर्कीका अरेल सिमसिरले ६१औँ मिनेटमा गोल गर्दै खेल १–१ को बराबरीमा ल्याए।

तर, त्यसको तीन मिनेटपछि रिकार्डो कालाफिओरीले गोल गर्दै इटालीलाई पुनः अग्रता दिलाए। खेलको ८७औँ मिनेटमा इटालीले अर्को गोल थप्दै ३–१ को जित सुनिश्चित गर्‍यो।

जितपछि इटाली चार खेलबाट दोस्रो स्थानमा पुगेको छ भने टर्की चौथो स्थानमा रहेको छ।