संविधान संशोधन प्रस्तावमा काँग्रेसभित्रै मतभेद,देउवाको निर्देशन तोडिने सम्भावना

maitrinews

 

काठमाडौँ, १५ फागुन । नेपाली काँग्रेसभित्र संविधान संशोधन प्रस्तावका विषयमा मतभेद देखिएको छ । पार्टी सभापति शेरबहादुर देउवाले जसरी पनि विधेयक पारित गराउन निर्देशन दिए पनि सो निर्देशन तोडिने सम्भावन बढ्दै छ । पछिल्ला दिनमा देउवाका गतिविधिप्रति तीव्र असन्तुष्ट पौडेल पक्षका केही सांसदहरुले देउवाको आदेश नमान्ने जनाउ दिइसकेका छन् तर देउवा भने जसरी पनि प्रस्ताव पारित गराउन सक्रिय हुनुभएको छ ।

तराई–मधेसबाट प्रतिनिधित्व गर्ने काँग्रेसका सांसदसँग संशोधन प्रस्तावका सम्बन्धमा छलफल गर्न आज बोलाइएको बैठकले जसरी भए पनि संशोधन पारित गर्नुपर्ने सुझाव दिएको छ । सांसदले प्रतिपक्षी नेकपा एमालेलगायत सबै दलसँग छलफल गरी संशोधन प्रस्तावका बारे निर्णय गर्नुपर्ने सुझाव दिएको बैठकपछि सभापति शेरबहादुर देउवाले जानकारी दिनुभयो ।

प्रस्तावमाथि थप पूरक प्रस्ताव आउँछ कि भन्ने सञ्चारकर्मीको जिज्ञासामा उहाँले हाल दर्ता भएको प्रस्ताव नै पारित हुने विश्वास व्यक्त गर्नुभयो । एक फरक प्रसङ्गमा सभापति देउवाले राजदूत नियुक्तिको विषय पार्टी केन्द्रीय समितिमा छलफल गर्न आवश्यक नरहेको बताउनुभयो ।
बैठकमा सहभागी काँग्रेस नेता फरमुल्ला मन्सुरले प्रस्ताव ‘सम्पूर्ण तराई–मधेसका जनताको हितमा भएकाले’ प्रस्ताव पारित गर्न काँग्रेस एक ढिक्का भएर लाग्नेछ भन्नुभयो । ‘मधेसी जनतालाई अधिकारसम्पन्न बनाउन र संविधानप्रतिको असन्तुष्टि समाप्त पार्न संशोधन आएकाले’ यसलाई जसरी भए पनि पारित गराउनुपर्ने निष्कर्षमा काँग्रेस पुगेको उहाँको भनाइ थियो । पूरक प्रस्तावका सम्बन्धमा नेता मन्सुरले सत्ता पक्ष सबै दलको सहमतिमा अघि बढ्ने धारणा व्यक्त गर्नुभयो ।