मेस्सीको ला लिगामा ३३ औं ह्याट्रिक

Maitrinews

 

काठमाडौं । स्पेनिश ला लिगा फुटबलमा शीर्ष स्थानको बार्सिलोनाले अर्को फराकिलो जित निकालेको छ । आइतबार राति भएको खेलमा बार्सिलोनाले रियाल बेटिसलाई ४–१ गोल अन्तरले पराजित गरेको हो ।

बार्सिलोनाका लागि अर्जेन्टाइन खेलाडी एवं बार्सिलोना कप्तान लियोनल मेस्सीले ह्याट्रिक गरे । जारी लिगमा उत्कृष्ट खेलिरहेका मेस्सीले २९ गोल गरिसकेका छन् जारी लिगमा ।

बार्सिलोनाका लागि थप गोल लुइस स्वारेजले गरे । घरेलु मैदानमा खेलेको रियालका लोरेन मोरोनले एक गोल फर्काए ।

१८ औं मिनेटमा मेस्सीले गोल गर्दै बार्सिलोनालाई सुरुवाती अग्रता दिलाए । ४५ औं मिनेटमा मेस्सीले व्यक्तिगत दोस्रो गोल गर्दै बार्सिलोनाको अग्रता २–० को बनाए ।

खेलको ६३ औं मिनेटमा स्वारेजले गोल गर्दै बार्सिलोनाको अग्रता तेब्बर बनाए । खेलको ८२ औं मिनेटमा घरेलु टोलीका मोरोनले एक गोल गर्दै खेल ३–१ को बनाए ।

खेलको ८५ औं मिनेटमा मेस्सीले ह्याट्रिक गोल गर्दै बार्सिलोनालाई ४–१ को जित दिलाए । योसंगै मेस्सीले ला लिगामा ३३ औं ह्याट्रिक पुरा गरे ।

जितसंगै बार्सिलोनाले लिगमा १० अंकको अग्रता बनाएको छ । बार्सिलोनाले २८ खेलबाट ६६ अंक जोडेको छ ।
दोस्रो स्थानको एट्लेटिको मड्रिडको ५६ अंक रहेको छ ।