भ्रष्टाचार नियन्त्रण र सुशासनमा सरकार गम्भीर छ : प्रधानमन्त्री दाहाल

काठमाडौं, २४ पुस । प्रधानमन्त्री पुष्पकमल दाहाल ‘प्रचण्ड’ले भ्रष्टाचार नियन्त्रण र सुशासनको प्रत्याभूतिका निम्ति सरकारको प्रभावकारी भूमिका र रााष्ट्रिय संस्कृतिका साथै जागरण जरूरी रहेको बताउनुभएकाे छ ।

आज बिहान सिंहदरबारमा भएकाे अख्तियार दुरुपयोग अनुसन्धान आयोगका प्रमुख आयुक्त र आयुक्तहरूसँगको छलफलमा उहाँले आफ्नो तेस्रो कार्यकाल सामाजिक न्याय, सुशासन र समृद्धिमा नै केन्द्रित हुने बताउनुभएकाे हाे ।

भ्रष्टाचार निवारण एउटा मात्र निकायले गर्न नसक्ने भन्दै प्रधानमन्त्री दाहालले भ्रष्टाचार निवारणमा आफू गम्भीर रहेको बताउनुभयाे ।

ऐन संशोधन, क्षमता अभिवृद्धि, संरचनागत सुधार लगायतका काममा सरकारले प्रभावकारी भूमिका खेल्ने उहाँको भनाइ छ ।

राजनीतिक नेतृत्वमा इच्छाशक्तिको कमि र सरकारको भूमिकाका कारण सही व्यवस्थापन गर्न नसकेको भन्दै वहाँले यो पटक सही नेतृत्व र सही व्यवस्थापन हुने दाबी समेत गर्नुभयाे ।

छलफलका क्रममा आयोगका प्रमुख आयुक्त प्रेमकुमार राईले वर्तमान सरकार गठनपछि सुशासनका पक्षमा गरिएको प्रारम्भिक प्रयासले आफूहरू उत्साहित भएको बताउनुभयाे ।

प्रधानमन्त्रीको सचिवलाई निर्देशनात्मक सम्बोधनले आयोग उत्साहित भएको र राज्यका सबै अंगहरू जिम्मेवार भएर लाग्दा भ्रष्टाचार नियन्त्रणमा अपेक्षित परिणाम हासिल गर्न सकिने उहाँको भनाइ थियो ।

आयोगले संसदमा विचारधीन ऐन संशोधनको प्रस्तावलाई अगाडि बढाउन, आयोगको क्षमता अभिवृद्धि र कार्यक्षेत्र बिस्तारका निम्ति अभिभावकीय भूमिका निर्वाह गर्न प्रधानमन्त्रीसमक्ष आग्रह गर्नुभएकाे छ ।