गृहमन्त्री रवि लामिछानेको नागरिकता विवाद

गृहमन्त्री लामिछानेको नागरिकता विवाद मुद्दाको अन्तिम सुनुवाइ आजदेखि, काठमाडौं प्रहरी परिसरले पनि अनुसन्धान गर्दै

काठमाडौं, ११ माघ । गृहमन्त्री रवि लामिछानेको नागरिकता विवादसम्बन्धी मुद्दाकाे अन्तिम सुनुवाइ आजबाट हुने भएको छ ।

लामिछानेविरुद्धको मुद्दाको संवैधानिक इजलासले पेशी सार्न नमिल्ने र अग्राधिकारसमेत दिएकाले पूर्ण सुनुवाइ हुने भएको हो । मुद्दाको संवैधानिक इजलासले सुनुवाइ गर्ने छ ।

यसअघि अमेरिकाको नागरिकता भएकै समयमा नेपाली नागरिकता प्रयोग गरेर पासपोर्ट बनाएको भन्दै लामिछानेलाई सांसदका रूपमा शपथ ग्रहण रोक्न माग गर्दै सर्वोच्च अदालतमा रिट दायर भएको थियो ।

प्रारम्भिक सुनुवाइमा अन्तरिम आदेश अस्वीकार गरिए पनि उक्त प्रयोजनका लागि दुवै पक्षलाई छलफलका लागि बोलाइएको थियो । संवैधानिक इजलासले बहस सुनेपछि अन्तरिम आदेश दिन अस्वीकार गरेको थियो ।

पुस २२ गते भएको उक्त सुनुवाइपछि कामु प्रधान न्यायाधीश हरिकृष्ण कार्कीसहित ५ जना वरिष्ठ न्यायाधीशको इजलासले दुवै पक्षबाट पेशी सार्न नमिल्ने र अग्राधिकारसहित माघ ११ गतेका लागि पूर्ण सुनुवाइको पेशी तोकिएको थियो ।

लामिछानेको नागरिकता सम्बन्धी विवादमा अहिले काठमाडौं प्रहरी परिसरले पनि अनुसन्धान गरिरहेको छ ।