काठमाडौं । म्यानचेस्टर युनाइटेडका प्रमुख प्रशिक्षक माइकल क्यारिक र कप्तान ब्रुनो फर्नान्डेसबीच चेल्सीविरुद्धको खेलअघि विवाद समाधान गर्ने उद्देश्यले आपसी छलफल भएको छ।

३२ वर्षीय पोर्तुगाली मिडफिल्डर फर्नान्डेस आइतबार बोर्नमाउथविरुद्ध युनाइटेडले ३–० को हार बेहोरेको खेलमा बेन्चमै सीमित रहे, मैदानमा उत्रिएनन्। च्याम्पियन्स लिगमा कोमोसँग ४–१ ले पराजित भएपछि उनले क्यारिकको रणनीतिको आलोचना गरेका थिए, जसपछि उनलाई बेन्चमा राखिएको थियो।

स्रोतका अनुसार मंगलबार क्लबको प्रशिक्षण मैदानमा दुवैबीच निजी रूपमा कुराकानी भएको हो। समस्याहरू खुलस्त राख्ने उद्देश्यले उक्त छलफल गरिएको बताइएको छ। २०२३ मा क्लबको कप्तान बनाइएका फर्नान्डेसले आफ्ना आलोचनात्मक टिप्पणीका लागि माफी मागे वा मागेनन् भन्ने भने स्पष्ट छैन।

युनाइटेड शनिबार (जीएमटी १२:३० बजे) चेल्सीको मैदान स्टामफोर्ड ब्रिजमा प्रतिस्पर्धा गर्दै छ। उक्त खेलमा फर्नान्डेस सुरुवाती एघारमा फर्कन सक्ने सम्भावना छ।

बोर्नमाउथविरुद्धको हारपछि क्यारिकलाई हटाइने व्यापक अनुमान गरिएको थियो, तर उनी चेल्सीविरुद्धको प्रिमियर लिग खेलमा पनि टोलीको नेतृत्व गर्नेछन्। प्रिमियर लिगमा टोली १६औं स्थानमा रहे पनि ४५ वर्षीय क्यारिकले ओल्ड ट्राफोर्डमा परिस्थिति सुधार्ने अवसर पाउन योग्य रहेको बोर्डले निर्णय गरेको छ।

बुधवार क्यारिकका लागि अर्को राम्रो खबर पनि आयो। चोटका कारण दुई हप्ता बाहिर रहेका मिडफिल्डर कोबी मैनु अभ्यासमा फर्किएका छन्।

यस सिजनको प्रिमियर लिगमा आठ खेलमा एउटामात्र जित निकाल्न सके पनि क्लबको वर्तमान संकटका लागि पूर्ण रूपमा क्यारिकलाई मात्र दोषी ठहर्‍याइएको छैन भन्ने बोर्डको धारणा छ। क्लबका वरिष्ठ अधिकारीहरूले च्याम्पियन्स लिगका लागि योग्यता हासिल गर्न सक्षम ठान्ने खेलाडीहरूको समूहले निकै कमजोर प्रदर्शन गरिरहेको र त्यसको केही जिम्मेवारी उनीहरूले पनि लिनुपर्ने ठानेका छन्।

एक खेलाडीले बीबीसी स्पोर्टलाई भने, “हामी सबैले अवस्था सुधार्न चाहन्छौं भन्ने भावना छ। खेलाडी, स्टाफ, सबैले।”

यसैबीच, क्यारिकको विकल्पका रूपमा क्लबले न्युकासल युनाइटेडका पूर्वप्रशिक्षक एडी होउ र जर्मनी तथा बायर्न म्युनिखका पूर्वप्रशिक्षक युलियन नागेल्सम्यानलाई छोटो सूचीमा राखेको बीबीसी स्पोर्टका स्रोतहरूले जानकारी दिएका छन्। होउलाई नियुक्त गरिए उनको पुरानो क्लब न्युकासलले करोडौं पाउन्डको क्षतिपूर्तिको दाबी गर्नेछ भने नागेल्सम्यान हाल कुनै क्लबसँग आबद्ध छैनन्।

स्रोत: बीबीसी स्पोर्ट