देशका विभिन्न स्थानमा भारी वर्षा र हिमपातको उच्च जोखिम, उच्च सतर्कता अपनाउन आग्रह

मैत्री न्युज

११ कार्तिक २०८३

४ घण्टा अगाडि

देशका विभिन्न स्थानमा भारी वर्षा र हिमपातको उच्च जोखिम, उच्च सतर्कता अपनाउन आग्रह

काठमाडौँ, ११ कात्तिक। बङ्गालको खाडीमा विकसित भइरहेको ‘अरनब’ चक्रवातको प्रभावले आगामी कात्तिक १३ र १४ गते नेपालमा भारी वर्षा, चट्याङ र हावाहुरीको सम्भावना रहेको छ। यसैबीच, राष्ट्रिय विपद् जोखिम न्यूनीकरण तथा व्यवस्थापन प्राधिकरणले एक सूचना जारी गर्दै उच्च सतर्कता अपनाउन सबैमा विशेष आग्रह गरेको छ।

प्राधिकरणका प्रवक्ता रामबहादुर केसीका अनुसार जल तथा मौसम विज्ञान विभागको पूर्वानुमानअनुसार यस चक्रवातको प्रभाव आगामी कात्तिक १३ गते शुक्रबारदेखि नेपालमा पर्ने अनुमान गरिएको छ।

कुन-कुन क्षेत्रमा कस्तो प्रभाव?

मध्यमदेखि भारी वर्षा: कोशी, मधेस, बागमती, गण्डकी र लुम्बिनी प्रदेशका धेरै स्थानमा मेघगर्जन, चट्याङ र हावाहुरीसहित मध्यम वर्षा तथा केही स्थानमा भारी वर्षाको सम्भावना रहेको छ।
सामान्य प्रभाव: कर्णाली र सुदूरपश्चिम प्रदेशका केही स्थानमा समेत वर्षा हुन सक्नेछ।
हिमपात र हिमपहिरो: देशका उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको उच्च जोखिम रहेको प्राधिकरणले जनाएको छ।

सुरक्षाका लागि प्राधिकरणको अपिल

सम्भावित विपद्जन्य घटनाबाट जोगिन प्राधिकरणले निम्न कुराहरूमा विशेष ध्यान दिन अनुरोध गरेको छ:

उच्च पहाडी तथा हिमाली क्षेत्रमा यात्रा नगर्न।
अत्यावश्यक कामबाहेक अन्य यात्रा नगर्न।
नदी र खोलाका किनार तथा बाढीको जोखिम भएका क्षेत्रहरूमा नबस्न।
मौसमसम्बन्धी आधिकारिक पूर्वसूचनालाई नियमित रूपमा अवलोकन गर्न र जोखिम देखिएमा तत्काल सुरक्षित स्थानतर्फ जान।