काठमाडौं/दिल्ली, ८ जेठ । भारतीय राजधानी दिल्लीमा एक नेपाली नागरिक पाकिस्तानी गुप्तचर संस्था आइएसआइको एजेन्ट भएको आरोपमा पक्राउ परेका छन्। दिल्ली प्रहरीले अन्सरुल मियाँ अन्सारी नामका ती नेपालीलाई आइएसआइको ‘स्लिपर सेल’ सदस्यका रूपमा पक्राउ गरेको भारतीय सञ्चारमाध्यमले जनाएका छन्।

भारतीय समाचार एजेन्सी एएनआईका अनुसार, दिल्ली प्रहरीले हालसम्म २१ जना आइएसआइ एजेन्टहरू पक्राउ गर्ने सिलसिलामा अन्सारीलाई नियन्त्रणमा लिएको हो। हिन्दुस्तान टाइम्सले जनाएअनुसार, उनीविरुद्ध गत मे महिनामै अभियोगपत्र दायर भइसकेको र हाल उनी तिहाड जेलमा छन्। प्रहरीले अन्सारीलाई दिल्लीको एक होटलबाट पक्राउ गरेको र उनी पाकिस्तान जाने तयारीमा रहेको दाबी गरेको छ।

भारतीय सञ्चारमाध्यमका अनुसार, अन्सारीले आफू कतारमा ट्याक्सी चालकका रूपमा काम गर्दा आइएसआइसँग सम्पर्कमा आएको बयान दिएका छन्। त्यसपछि उनलाई कतारबाट पाकिस्तान लगेर आइएसआइका उच्च अधिकारीहरूले तालिम दिएको र गोप्य कागजातहरू सिडीमा राखेर पाकिस्तान पठाउने जिम्मेवारीसहित नेपाल हुँदै दिल्ली पठाएको पनि एएनआईले उल्लेख गरेको छ।

यद्यपि, यस घटनाबारे नेपाल प्रहरीले भने कुनै औपचारिक जानकारी नभएको जनाएको छ। कतारमा क्याब चलाउने नेपाली नागरिकलाई पाकिस्तानी गुप्तचर संस्थाले प्रयोग गरेको यो घटनाले नेपालीहरूको वैदेशिक रोजगारीको सुरक्षामाथि पनि प्रश्न उठाएको छ।