इंग्ल्यान्डसँग ३–२ ले पराजित स्पेन, ४३ खेलको अपराजित यात्रा टुंगियो
म्याड्रिड । इंग्ल्यान्डले स्पेनलाई ३–२ गोलले पराजित गर्दै यूईएफए नेसन्स लिगमा शानदार जित निकालेको छ। यससँगै स्पेनको ४३ खेलसम्मको अपराजित यात्रा टुंगिएको छ।
शनिबार राति म्याड्रिडमा भएको समूह ‘ए३’ को खेलमा इंग्ल्यान्डले पहिलो हाफमै अग्रता बनाएको थियो। दोस्रो हाफमा तीन गोलको अग्रता लिएपछि १० खेलाडीमा सीमित भएको इंग्ल्यान्डले अन्तिम समयमा स्पेनको लगातार दबाब झेले पनि जित जोगाउन सफल भयो।
खेलको पहिलो हाफको अन्तिम समयमा कप्तान ह्यारी केनले पेनाल्टीमार्फत गोल गर्दै इंग्ल्यान्डलाई १–० को अग्रता दिलाए। स्पेनका पाउ कुबार्सीले पेनाल्टी क्षेत्रभित्र केनलाई फाउल गरेपछि प्राप्त अवसरमा केनले गोल गरेका थिए।
दोस्रो हाफ सुरु भएको आठ मिनेटमै इज्री कोन्साले डेक्लान राइसको कर्नरमा हेडरमार्फत गोल गर्दै इंग्ल्यान्डको अग्रता २–० बनाए। त्यसको चार मिनेटपछि बेन ह्वाइटले गोल गरेपछि इंग्ल्यान्ड ३–० ले अघि बढ्यो।

तीन गोलले पछि परेको स्पेनले खेलमा फर्कने प्रयास गरिरहेका बेला इंग्ल्यान्डका इलियट एन्डरसनले रातो कार्ड पाए। ६५औँ मिनेटमा लमिन यामाललाई गोल गर्ने स्पष्ट अवसरबाट रोक्ने क्रममा एन्डरसनले फाउल गरेपछि उनलाई सिधै रातो कार्ड देखाइएको थियो।
त्यसपछि स्पेनले दबाब बढाउँदै खेलमा फर्कने संकेत देखायो। मिकेल ओयार्जाबालले पेनाल्टीमार्फत गोल गर्दै अग्रता ३–१ मा झारे। त्यसको केही मिनेटपछि निकोलस विलियम्सले गोल गर्दै स्पेनलाई ३–२ को अवस्थामा पुर्याए।
अन्तिम मिनेटमा स्पेनले बराबरी गोलका लागि निरन्तर आक्रमण गरे पनि इंग्ल्यान्डका गोलरक्षक जेम्स ट्राफोर्डले उत्कृष्ट बचाउ गरे। इन्जुरी समयमा उनले फर्मिन लोपेजको प्रहार रोक्नुका साथै त्यसको रिबाउन्डमा आयमेरिक लापोर्टेको प्रहारसमेत बचाउँदै इंग्ल्यान्डको जित सुनिश्चित गरे।
समाचार एजेन्सीहरूका अनुसार, स्पेनले यसअघि सन् २०२४ को मार्चमा कोलम्बियासँग १–० ले पराजित भएयता कुनै खेल हारेको थिएन। त्यसयता स्पेनले ४३ खेलसम्म अपराजित यात्रा कायम राखेको थियो। यस अवधिमा उसले युरोपियन च्याम्पियनसहित विश्व च्याम्पियनको उपाधिसमेत जितेको थियो।
यस जितसँगै इंग्ल्यान्ड र स्पेन दुवैले समूह ‘ए३’ मा १५–१५ अंक बनाए पनि गोल अन्तरका आधारमा इंग्ल्यान्ड शीर्ष स्थानमा रह्यो। इंग्ल्यान्डका लागि यो लगातार १०औँ अवे जितसमेत हो।
नेसन्स लिगको क्वार्टरफाइनलको ‘ड्र’ आगामी मार्चमा हुनेछ। इंग्ल्यान्डले ‘ए’ समूहका उपविजेतामध्ये स्पेनबाहेक कुनै एक टोलीसँग खेल्नेछ भने स्पेनले अन्य समूहका विजेतामध्ये एक टोलीको सामना गर्नेछ।
