काठमाडौँ, ३२ असार। जल तथा मौसम विज्ञान विभागले देशभर मनसुनी वायुको प्रभाव सक्रिय रहेको जनाएको छ। मनसुनको न्यूनचापीय रेखा सरदर स्थानमा रहेकाले आज बुधबार देशका अधिकांश भू-भागमा बदली र वर्षाको सम्भावना रहेको छ।

विभागका अनुसार, आज दिउँसो कोशी, मधेस, बागमती, गण्डकी र लुम्बिनी प्रदेशका धेरैजसो स्थानमा मेघगर्जन र चट्याङसहित हल्कादेखि मध्यम वर्षा हुनेछ। विशेषगरी, कोशी प्रदेशका केही स्थानमा भारीदेखि धेरै भारी वर्षाको चेतावनी दिइएको छ। यसैगरी, मधेस, बागमती, गण्डकी र लुम्बिनी प्रदेशका एक-दुई स्थानमा भारी वर्षा हुन सक्छ। कोशी र मधेस प्रदेशका तराई क्षेत्रमा हावाहुरीको पनि सम्भावना रहेको छ।

बुधबार राति कोशी, मधेस र सुदूरपश्चिम प्रदेशका केही स्थानहरूमा वर्षा केन्द्रित हुने देखिन्छ। यी प्रदेशका एक-दुई स्थानमा भारी वर्षाको सम्भावना छ। देशका अन्य पहाडी भू-भागका केही स्थानमा पनि हल्कादेखि मध्यम वर्षा हुनेछ। मधेस प्रदेशमा राति पनि हावाहुरी चल्न सक्ने पूर्वानुमान छ।
उच्च-पहाडी तथा हिमाली भू-भागका थोरै स्थानहरूमा भने दिन र रात दुवै समयमा हल्का वर्षा वा हिमपात हुन सक्ने विभागले जनाएको छ।