श्रीलङ्कामा चक्रवातबाट मृत्यु हुनेको सङ्ख्या ४७९ पुग्यो : ३५० जना अझै बेपत्ता
काठमाडौँ, मंसिर १८ । श्रीलङ्कामा हालै आएको विनाशकारी चक्रवात र त्यसपछिको मौसमी विपद्का कारण जनधनको ठूलो क्षति भएको छ । श्रीलङ्काको विपद् व्यवस्थापन केन्द्र (डिएमसी) ले बिहीबार सार्वजनिक गरेको पछिल्लो तथ्याङ्कअनुसार यस प्रकोपमा परी मृत्यु हुनेको सङ्ख्या ४७९ पुगेको छ ।
केन्द्रका अनुसार विपद्मा परी अझै ३५० जना बेपत्ता रहेका छन् । जसको खोजी कार्य जारी छ । यो प्राकृतिक प्रकोपले राष्ट्रव्यापी रूपमा गम्भीर असर पारेको छ । तथ्याङ्क अनुसार मुलुकभरका ४ लाख ५५ हजार ४०५ परिवारका १६ लाखभन्दा बढी नागरिकहरू बाढी, पहिरो र डुबानबाट प्रत्यक्ष रूपमा प्रभावित भएका छन् ।
डिएमसीले सार्वजनिक गरेको विवरणअनुसार १ हजार २८९ घरहरू पूर्ण रूपमा ध्वस्त भएका छन् भने ४४ हजार ५०० भन्दा बढी घरमा आंशिक क्षति पुगेको छ । कृषि सेवा विभाग अन्तर्गतका १ हजार ७७७ वटा ट्याङ्की, ४८३ वटा बाँध र १ हजार ९३६ वटा सिँचाइ नहरहरू क्षतिग्रस्त भएका छन् । बाढी र पहिरोका कारण ३२८ वटा सडक सञ्जालमा क्षति पुग्दा यातायात सेवा प्रभावित भएको छ ।
अन्तर्राष्ट्रिय समुदायको सहयोग र सहानुभूति
विपद्को यो कठिन घडीमा अन्तर्राष्ट्रिय समुदायले श्रीलङ्कालाई सहयोगको हात बढाएका छन्।
-
चीनको सहयोग: चिनियाँ नेतृत्वले विनाशकारी बाढी र जनधनको क्षतिप्रति गहिरो दुःख व्यक्त गरेका छन्। श्रीलङ्का सरकारको अनुरोधलाई सम्बोधन गर्दै चीनले नगद अनुदानसहित तत्काल आवश्यक पर्ने लाइफ ज्याकेट, टेन्ट लगायतका आपत्कालीन मानवीय सहायता सामग्री उपलब्ध गराउने निर्णय गरेको छ।
-
एसियाली विकास बैंक (एडीबी): यसैगरी, एसियाली विकास बैंकले पनि श्रीलङ्कालाई आपत्कालीन अवस्थामा सघाउन ३० लाख अमेरिकी डलर (करिब ४० करोड नेपाली रुपैयाँ) बराबरको अनुदान सहायता स्वीकृत गरेको छ।
सरकारले प्रभावित क्षेत्रमा उद्धार, राहत र पुनःस्थापनाको कार्यलाई प्राथमिकतामा राखेर काम अघि बढाइरहेको जनाएको छ।
