प्रतिनिधिसभा निर्वाचन सम्पन्न: १६५ क्षेत्रकै नतिजा सार्वजनिक, कुन दलले कति सिट ल्याए ?

काठमाडौँ, २६ फागुन । निर्वाचन आयोगले प्रतिनिधिसभा सदस्य निर्वाचनको प्रत्यक्षतर्फका सबै १६५ निर्वाचन क्षेत्रको अन्तिम मतपरिणाम सार्वजनिक गरेको छ। सोमबार राति संखुवासभाको नतिजा आएसँगै फागुन २१ गते सम्पन्न ऐतिहासिक निर्वाचनको प्रत्यक्षतर्फको सबै परिणाम प्राप्त भएको हो।

यस निर्वाचनमा नयाँ शक्तिका रूपमा उदाएको राष्ट्रिय स्वतन्त्र पार्टी (रास्वपा) ले दुई तिहाइ नजिकको सिट जित्दै मुलुकको राजनीतिक परिदृश्यमा फेरबदल ल्याएको छ।

आयोगले सार्वजनिक गरेको अन्तिम तथ्याङ्कअनुसार प्रत्यक्षतर्फ कूल १६५ सिटमध्ये दलहरूको अवस्था यस प्रकार छ:
राष्ट्रिय स्वतन्त्र पार्टी (रास्वपा): १२५ सिट
नेपाली कांग्रेस: १८ सिट
नेकपा (एमाले): ९ सिट
नेपाली कम्युनिष्ट पार्टी (नेकपा): ८ सिट
श्रम संस्कृति पार्टी: ३ सिट
राष्ट्रिय प्रजातन्त्र पार्टी (राप्रपा): १ सिट
स्वतन्त्र (महावीर पुन): १ सिट

सबैभन्दा अन्तिममा संखुवासभाको नतिजा सार्वजनिक भएको हो, जहाँ नेकपा एमालेका उम्मेदवार अर्जुनकुमार कार्कीले रास्वपाका मिङ्मा शेर्पालाई पराजित गर्दै जित निकाल्नुभयो। म्याग्दीबाट स्वतन्त्र उम्मेदवारी दिनुभएका वैज्ञानिक महावीर पुन पनि प्रतिनिधिसभा सदस्यमा निर्वाचित हुनुभएको छ।

धनुषा–१ मा विवाद र प्रमाणपत्र वितरण
उम्मेदवारी खारेजीको विषयलाई लिएर विवादित बनेको धनुषा निर्वाचन क्षेत्र नम्बर १ मा निर्वाचन आयोगले नेपाली कम्युनिष्ट पार्टी (नेकपा) का मातृकाप्रसाद यादवलाई विजयी भएको प्रमाणपत्र प्रदान गरेको छ। रास्वपाका उम्मेदवारको उम्मेदवारी खारेज भएपछि उत्पन्न यो विवाद हाल सर्वोच्च अदालतमा विचाराधीन रहेको छ।

समानुपातिकतर्फ ६ दलले कटाए ‘थ्रेसहोल्ड’
समानुपातिक निर्वाचन प्रणालीतर्फ पनि मतगणना अन्तिम चरणमा पुगेको छ। हालसम्म एक करोडभन्दा बढी मत गणना भइसकेको छ। प्रारम्भिक रुझानअनुसार समानुपातिकमा पनि रास्वपाले कूल सदर मतको करिब ५० प्रतिशत हिस्सा ओगट्ने देखिएको छ।

आयोगका अनुसार प्रतिनिधिसभामा प्रतिनिधित्वका लागि आवश्यक न्यूनतम ३ प्रतिशत ‘थ्रेसहोल्ड’ कटाउने दलहरूमा रास्वपा, नेपाली कांग्रेस, नेकपा (एमाले), नेकपा, श्रम संस्कृति पार्टी र राप्रपा रहेका छन्। प्रत्यक्ष र समानुपातिक दुवैतर्फको अन्तिम नतिजा सार्वजनिक भएपछि नयाँ सरकार गठनको प्रक्रिया सुरु हुनेछ।