स्वास्थ्य बीमामा आर्थिक सङ्कट, जेठ १६ देखि निजी अस्पतालमा सेवा बन्द
काठमाडौँ, १३ जेठ । नेपाल सरकारले नागरिकको उपचारमा सहज पहुँच पुर्याउने उद्देश्यले सुरु गरेको ‘स्वास्थ्य बीमा कार्यक्रम’ गम्भीर आर्थिक सङ्कटमा फसेको छ। बजेट र आर्थिक अभावको कारण देखाउँदै स्वास्थ्य बीमा बोर्डले देशभरका निजी अस्पतालमा आकस्मिकबाहेकका सबै स्वास्थ्य बीमा सेवा स्थगित गर्ने निर्णय गरेपछि लाखौँ बीमित नागरिक अन्योलमा परेका छन्।
बोर्डले जारी गरेको आधिकारिक सूचनाअनुसार आगामी जेठ १६ गतेदेखि अर्को निर्णय नभएसम्मका लागि निजी स्वास्थ्य संस्थाबाट दिइँदै आएका बीमासम्बन्धी नियमित सेवाहरू बन्द हुनेछन्।
यस निर्णयसँगै अब स्वास्थ्य बीमा गरेका नागरिकले निजी अस्पतालमा ओपिडी (OPD) सेवा, नियमित स्वास्थ्य परीक्षण, शल्यक्रिया, औषधि तथा अन्य नियमित उपचारको सुविधा सहज रूपमा पाउने छैनन्। यद्यपि, बिरामीको ज्यानै जोखिममा पर्ने अवस्थाका ‘आकस्मिक सेवा’ (Emergency) भने यथावत् रहने बोर्डले स्पष्ट पारेको छ।
बोर्डको यो कदमबाट देशभर स्वास्थ्य बीमा कार्यक्रममा आबद्ध रहेका ३६ वटा निजी अस्पताल तथा मेडिकल कलेजहरू प्रत्यक्ष रूपमा प्रभावित हुने भएका छन्।
“सबै नागरिकलाई स्वास्थ्य सेवामा पहुँच” भन्ने नारासहित सुरु गरिएको यो लोकप्रिय कार्यक्रम अहिले आर्थिक अभाव, प्रशासनिक कमजोरी र समयमै बक्यौता भुक्तानी नहुँदा धराशायी हुने अवस्थामा पुगेको भन्दै चौतर्फी आलोचना सुरु भएको छ।
