बिवाइडी गाडी प्रकरण: प्रमुख भन्सार अधिकृतसहित ९ कर्मचारी जिम्मेवारीमुक्त, अर्थ मन्त्रालयद्वारा छानबिन तीव्र

काठमाडौँ, २३ जेठ । चीनबाट मुस्ताङको कोरोला नाका हुँदै भित्रिएका ७७५ वटा बिवाइडी  विद्युतीय गाडीमा भन्सार छली भएको आशंकामा सरकारले कडा कदम चालेको छ। सो प्रकरणमा संलग्नताको आशंकामा रसुवागढी भन्सार कार्यालयका प्रमुख भन्सार अधिकृतसहित ९ जना कर्मचारीलाई जिम्मेवारीमुक्त गरी भन्सार विभाग तानिएको छ।

सशस्त्र प्रहरी बलले कोरोला नाकाबाट भित्रिएका ती गाडीहरूलाई नियन्त्रणमा लिएपछि राजस्व छलीको विषय सतहमा आएको थियो। अर्थ मन्त्रालयका अनुसार, रसुवागढी भन्सार विन्दुमा भौतिक रूपमा उपस्थित नै नभएका सवारी साधनको कागजी प्रक्रिया मिलाएर जाँचपास गरिएको भेटिएपछि कर्मचारीहरूमाथि कारबाही अघि बढाइएको हो।

छानबिन समितिको सिफारिसमा कारबाही
अर्थमन्त्री डा. स्वर्णिम वाग्लेको सचिवालयले दिएको जानकारीअनुसार, यस सम्बन्धमा मन्त्रालयले गठन गरेको उच्चस्तरीय छानबिन समितिको प्रारम्भिक सिफारिसका आधारमा कर्मचारीहरूलाई विभाग तानिएको हो। “भन्सार बिन्दुमै नआएका सवारी साधनको जाँचपास भएको भन्ने गम्भीर विषयमा थप अनुसन्धान आवश्यक देखिएकाले उनीहरूलाई जिम्मेवारीबाट हटाइएको हो,” सचिवालयले जारी गरेको नोटमा उल्लेख छ।

टोली कार्यक्षेत्रमै, आयातकर्तामाथि पनि निगरानी
यसैबीच, कोरोला नाकाबाट भन्सार जाँचपास भएका भनिएका ती कारहरूको वास्तविकता पत्ता लगाउन अर्थ मन्त्रालय र भन्सार विभागका उपसचिवहरूको नेतृत्वमा एक टोली मुस्ताङ पुगेको छ। नेपाल प्रहरी र सशस्त्र प्रहरीका प्रतिनिधि सम्मिलित सो विशेष अनुसन्धान टोलीले अहिले स्थलगत रूपमा छानबिन गरिरहेको छ।

सशस्त्र प्रहरीको नियन्त्रणमा रहेका ती गाडीहरू र आयातकर्ता कम्पनीको कागजातमाथि समेत सूक्ष्म अनुसन्धान भइरहेको छ। राजस्व चुहावट गर्ने उद्देश्यले प्रक्रिया मिचेर गाडी भित्र्याएको प्रमाणित भएमा आयातकर्तामाथि समेत कडा कानुनी कारबाही गरिने मन्त्रालयले जनाएको छ।

यो प्रकरणले नेपालका उत्तरी नाकाहरूमा हुने भन्सार प्रशासनको पारदर्शिता र सुरक्षा चुनौतीमाथि पुनः प्रश्न उठाएको छ।