हङकङलाई हराउँदै नेपाल बन्यो च्याम्पियन, वर्षाले प्रभावित फाइनलमा डीएलएस पद्धतिबाट जित
काठमाडौँ, २५ जेठ । सिङ्गापुरमा सम्पन्न एसियन गेम्स पुरुष क्रिकेट छनोटको उपाधि नेपालले जितेको छ । सोमबार भएको रोमाञ्चक फाइनल भिडन्तमा हङकङलाई डकवर्थ लुइस (डीएलएस) पद्धतिका आधारमा १९ रनले पराजित गर्दै नेपाल च्याम्पियन बनेको हो ।
हङकङले दिएको १८९ रनको विशाल लक्ष्य पछ्याउने क्रममा नेपालले ११.३ ओभरमा २ विकेट गुमाएर ११४ रन बनाएको अवस्थामा वर्षा सुरु भएको थियो । त्यसपछि खेल सम्भव नभएपछि डीएलएस पद्धतिअनुसार नतिजा निकालिएको हो । खेल रोकिँदाको अवस्थामा नेपाल डीएलएस पार स्कोर (९५ रन) भन्दा १९ रनले अगाडि थियो ।
नेपालको जितमा ओपनर कुशल भुर्तेलले उत्कृष्ट ब्याटिङ गरे । उनले मात्र ४० बलमा ६५ रनको अर्धशतकीय पारी खेल्दै टोलीलाई बलियो सुरुवात दिलाए । त्यस्तै कप्तान रोहित पौडेल ३५ रन र दीपेन्द्रसिंह ऐरी ९ रनमा अविजित रहे । हङकङका एहसान खान र आयुष शुक्लाले १–१ विकेट लिए ।
यसअघि टस हारेर पहिले ब्याटिङको निम्तो पाएको हङकङले निर्धारित २० ओभरमा ७ विकेट गुमाएर १८८ रनको बलियो योगफल तयार पारेको थियो । हङकङका लागि अंशुमन राथले विस्फोटक ब्याटिङ गर्दै ४५ बलमा ८० रन बनाए भने शाहिद वासिफले ५५ रनको योगदान दिए ।
बलिङतर्फ नेपालका शेर मल्लले उत्कृष्ट प्रदर्शन गरे । उनले ४ ओभरमा ३२ रन खर्चिएर महत्वपूर्ण ४ विकेट झारे । त्यस्तै करण केसीले २ र सन्दीप लामिछानेले १ विकेट लिए । एक समय १८ ओभरमा १७९ रन बनाएर विशाल योगफलतर्फ अग्रसर भएको हङकङलाई अन्तिम २ ओभरमा नेपाली बलरहरूले कसिलो बलिङ गर्दै रोकेका थिए ।
वर्षाका कारण खेल रोकिँदा नेपाल एक ऐतिहासिक कीर्तिमान बनाउनबाट भने चुकेको छ । यदि नेपालले खेलै जितेर १८९ रनको लक्ष्य पूरा गरेको भए यो नेपालको टी–२० आई इतिहासकै सबैभन्दा ठूलो रन चेज हुने थियो । यसअघि सन् २०२५ मा कुवेतविरुद्ध १८६ रनको लक्ष्य पूरा गरेको कीर्तिमान नेपालको नाममा छ ।
