रोमाञ्चक खेलमा केप भर्डेमाथि अर्जेन्टिनाको कठिन जित, विश्वकपको अन्तिम १६ मा प्रवेश
काठमाडौं, २० असार। साविक विजेता अर्जेन्टिना फिफा विश्वकप २०२६ को नकआउट चरणमा संघर्षपूर्ण जित निकाल्दै अन्तिम १६ मा प्रवेश गरेको छ । अमेरिकाको मियामी स्टेडियममा बुधबार सम्पन्न राउन्ड अफ ३२ को अत्यन्तै प्रतिस्पर्धात्मक खेलमा अफ्रिकी राष्ट्र केप भर्डेलाई ३–२ गोल अन्तरले पराजित गर्दै अर्जेन्टिनाले अघिल्लो चरणको यात्रा तय गरेको हो ।
निर्धारित ९० मिनेटको खेल १–१ को बराबरीमा सकिएपछि अतिरिक्त समयमा धकेलिएको खेलमा आत्मघाती गोल अर्जेन्टिनाका लागि भाग्यशाली सावित भयो ।
मेसीको अग्रता र केप भर्डेको पुनरागमन
खेलको सुरुवाती समयदेखि नै अर्जेन्टिनाले बलमाथि नियन्त्रण बनाए पनि केप भर्डेको रक्षापंक्ति तोड्न हम्मे–हम्मे परेको थियो । खेलको २९औं मिनेटमा कप्तान लियोनल मेसीले उत्कृष्ट गोल गर्दै अर्जेन्टिनालाई सुरुवाती अग्रता दिलाएका थिए । मेसीको गोलसँगै मियामी स्टेडियममा उपस्थित हजारौँ समर्थक उत्साहित बनेका थिए ।
तर, दोस्रो हाफमा केप भर्डेले आक्रामक रणनीतिका साथ मैदान प्रवेश गर्यो । खेलको ५९औं मिनेटमा डेरोय डुआर्टेले गोल गर्दै खेललाई १–१ को बराबरीमा ल्याए । त्यसपछि दुवै टोलीबाट गोलका प्रयास भए पनि निर्धारित ९० मिनेटसम्म थप गोल हुन सकेन र खेल अतिरिक्त समयमा पुग्यो ।
अतिरिक्त समयको रोमाञ्चकता र निर्णायक आत्मघाती गोल
थप गरिएको अतिरिक्त समयको सुरुवातमै अर्जेन्टिनाले पुनः अग्रता लियो । अतिरिक्त समयको दोस्रो मिनेटमा लिसान्ड्रो मार्टिनेजले गोल गर्दै अर्जेन्टिनालाई २–१ को स्थितिमा पुर्याए । अर्जेन्टिना जिततर्फ अघि बढेको देखिए पनि केप भर्डेले हार मानेन । ११ मिनेटपछि अर्थात् अतिरिक्त समयको पहिलो हाफको अन्त्यतिर सिड्नी लोप्स क्याब्रलले उत्कृष्ट गोल गर्दै खेललाई २–२ को रोमाञ्चक मोडमा पुर्याए ।
खेल पेनाल्टी सुटआउटतर्फ धकेलिने सम्भावना बढिरहेका बेला १११औं मिनेटमा केप भर्डेका लागि दुर्भाग्यपूर्ण क्षण बन्यो । अर्जेन्टिनाको आक्रमण बचाउने क्रममा केप भर्डेका डाइनी बोर्जेसले आफ्नै पोस्टमा आत्मघाती गोल गर्न पुगे । त्यही गोल नै अर्जेन्टिनाका लागि जितको आधार बन्यो ।
अन्ततः केप भर्डेको कडा चुनौतीलाई पन्छाउँदै साविक विजेता अर्जेन्टिना अन्तिम १६ मा पुग्न सफल भयो । केप भर्डेले उत्कृष्ट प्रदर्शन गरे तापनि अघिल्लो चरण प्रवेश गर्ने ऐतिहासिक अवसरबाट भने वञ्चित भयो । अब अर्जेन्टिनाले क्वार्टरफाइनल प्रवेशका लागि अर्को प्रतिस्पर्धीसँग भिड्नेछ ।
