बाढीको जोखिमका कारण १११ मेगावाटको रसुवागढी जलविद्युत् आयोजना बन्द : जनजीवन र यातायातमा सावधानी अपनाउन आग्रह
काठमाडौँ, असार २९ । रसुवाको ल्हेन्दे खोलामा पानीको सतह बढेसँगै लेदोसहितको बाढी आउन थालेपछि १११ मेगावाट क्षमताको रसुवागढी जलविद्युत् आयोजनाको विद्युत् उत्पादन पूर्वसावधानीस्वरूप बन्द गरिएको छ । आइतबार साँझदेखि खोलामा आएको अस्वभाविक बहावका कारण सम्भावित भौतिक क्षति टार्न आयोजनाले उत्पादन रोक्ने निर्णय गरेको हो ।
रसुवागढी जलविद्युत् केन्द्रका प्रमुख सन्तोष अधिकारीका अनुसार खोलामा लेदो र बाढीको मात्रा बढेपछि सुरुङतर्फ पानी लैजाने गेटहरू बन्द गरिएको छ । खोलाको अवस्था सामान्य भएमा सोमबारदेखि पुनः उत्पादन सुरु गरिने उहाँले जानकारी दिनुभयो । गत वर्ष असार २४ गते ल्हेन्दे खोलामा आएको भीषण बाढीले आयोजनाको बाँधसहितका संरचनामा ठूलो क्षति पुर्याएको थियो । सोही अनुभवलाई दृष्टिगत गर्दै यस वर्ष प्राविधिकहरूले उच्च सतर्कता अपनाएका हुन् ।
आयोजनाका कार्यकारी निर्देशक सत्यराम ज्याख्वाका अनुसार खोलाको बहावको निरन्तर अनुगमन भइरहेको छ र सुरक्षाको पूर्ण सुनिश्चिततापछि मात्र प्रणाली सञ्चालनमा ल्याइनेछ ।
भन्सार यार्ड र यातायातमा सतर्कता
भोटेकोशी नदीमा समेत पानीको सतह बढ्न थालेपछि रसुवागढी भन्सार यार्डमा रहेका मालवाहक तथा नयाँ सवारीसाधनहरूलाई तत्काल सुरक्षित स्थानमा सारिएको छ । भन्सार यार्डको उत्तरी भागबाट बाढी पस्न सक्ने जोखिम देखिएकाले चालकहरूले नेपाल इन्टरमोडल यातायात विकास समिति (प्रालि) सँग थप मजबुत तटबन्ध निर्माणको माग गरेका छन् ।
गोसाइँकुण्ड गाउँपालिका २ का वडाध्यक्ष कामी छिरिङ तामाङले नदी किनारमा बसोबास गर्ने स्थानीयवासीलाई सतर्क रहन र सवारीसाधन नदी आसपास नपार्किङ गर्न आग्रह गर्नुभएको छ ।
सडक अवरोध र वैकल्पिक मार्गको प्रयोग
बाढीका कारण मैलुङ सडकखण्ड जोखिमपूर्ण बनेपछि जिल्ला प्रशासन कार्यालय रसुवाले केरुङ आवतजावत गर्ने सवारीसाधनलाई वैकल्पिक मार्ग प्रयोग गर्न सूचित गरेको छ । सहायक प्रमुख जिल्ला अधिकारी ध्रुवप्रसाद अधिकारीका अनुसार मैलुङ खण्डमा जोखिम बढेकाले अब सवारीसाधनहरू बेत्रावती-कालिकास्थान-धुन्चे-स्याफ्रुबेँसी हुँदै रसुवागढी पुग्ने साविकको सडकबाट सञ्चालन हुनुपर्नेछ ।
प्रमुख जिल्ला अधिकारी नरेन्द्र परियारले वर्षायाममा नदी किनार र जोखिमयुक्त क्षेत्रमा यात्रा गर्दा विशेष सावधानी अपनाउन सर्वसाधारणलाई अनुरोध गर्नुभएको छ । उहाँले कुनै पनि विपद्को समयमा उद्धार र राहतका लागि आपत्कालीन निःशुल्क नम्बर १२३४ मा तत्काल सम्पर्क गर्न आह्वान गर्नुभएको छ । प्रशासनले नदीमा पानीको बहाव नघटुन्जेल उच्च सतर्कता अपनाउन सबैमा आग्रह गरेको छ ।
