ईयू सदस्यताका लागि युक्रेनको दोस्रो चरणको वार्ता सुरु: ‘सुपर मङ्गलबार’ भन्दै खुसी व्यक्त

ब्रसेल्स । युरोपियन युनियन (ईयू) ले युक्रेन लगायतका नयाँ सदस्य बन्न इच्छुक राष्ट्रहरूसँग सदस्यताका लागि दोस्रो चरणको औपचारिक वार्ता सुरु गरेको छ। रुसी आक्रमणको सामना गरिरहेको युक्रेनले सदस्यता प्रक्रियालाई तीव्रता दिन र छिटो निर्णयमा पुग्न ईयूमाथि दबाब दिइरहेका बेला यो वार्ता अगाडि बढेको हो।

यसअघि हंगेरीको तीव्र विरोधका कारण सदस्यता वार्ता प्रक्रियामा केही ढिलाइ भएको थियो। तर, २७ राष्ट्रहरूको समूह ईयूले गत महिना युक्रेनसँग पहिलो चरणको औपचारिक वार्ता सुरु गरेपछि अहिले दोस्रो चरणको प्रक्रिया थालनी भएको हो।

छवटा मुख्य समूहमा वार्ता हुने
ईयूको पूर्ण सदस्यता प्राप्त गर्नका लागि उम्मेदवार देशहरूले आफ्ना आन्तरिक कानुन र प्रणालीलाई ईयूको मापदण्डसँग मिलाउनुपर्ने हुन्छ। यसका लागि वातावरण, कृषि, न्यायिक प्रणाली लगायतका विषयहरूलाई छवटा विभिन्न ‘समूह’  मा विभाजन गरेर वार्ता अगाडि बढाइने प्रावधान छ। मङ्गलबार ब्रसेल्समा भएको बैठकमा ईयूका मन्त्रीहरू र युक्रेनी प्रतिनिधिहरूबीच विशेषगरी सुरक्षा, रक्षा र विदेश नीति जस्ता महत्त्वपूर्ण विषयमा छलफल भएको छ।

‘सुपर मङ्गलबार’ को संज्ञा
ईयूका आयुक्त मार्टा कोसले मंगलबारको विकासक्रमलाई ईयू विस्तारको इतिहासमा “सुपर मङ्गलबार” को संज्ञा दिनुभएको छ। उहाँले वार्तामा भएका उपलब्धिलाई अब छिटै पूर्णता दिनुपर्नेमा जोड दिनुभयो। यद्यपि, युरोपमा सुरु हुन लागेको गर्मी बिदाका कारण सबै प्राविधिक विषयहरूमा तत्कालै निष्कर्षमा पुग्न भने चुनौतीपूर्ण हुनसक्ने आकलन गरिएको छ।

अन्य राष्ट्रहरूको पनि सक्रियता
युक्रेनसँगै छिमेकी राष्ट्र मोल्डोभाले पनि ईयू सदस्यताका लागि दोस्रो चरणको वार्तामा सक्रिय सहभागिता जनाएको छ। त्यस्तै, अर्को महिना ईयूको प्रमुख उम्मेदवार बन्ने लक्ष्य राखेको मोन्टेनेग्रो र अल्बानियाले पनि आफ्ना एजेन्डाहरूलाई थप विस्तार गर्दै लगेका छन्।

सन् २०२२ मा रुसले आक्रमण गरेपछि युक्रेनले सुरक्षा र राजनीतिक स्थायित्वका लागि ईयूमा आबद्ध हुन निवेदन दिएको थियो। पूर्ण सदस्यता प्राप्त गर्ने यात्रा अझै लामो र कठिन भए तापनि पछिल्लो वार्ताले युक्रेनका लागि युरोपेली ढोका थप खुल्ला गरेको देखिएको छ।