त्रिशूली–३ को सुरुङबाट २०८ जनाको जीवितै उद्धार : ३८ चिनियाँ र ५ भारतीय नागरिक पनि सुरक्षित

काठमाडौँ, १३ भदौ । रसुवाको भोटेकोशीमा आएको भीषण बाढीका कारण त्रिशूली–३ जलविद्युत् आयोजनाको सुरुङभित्र फसेका २०८ जना नागरिकलाई नेपाली सेनाले जीवितै उद्धार गरेको छ । शनिबार दिउँसोसम्म नेपाली सेनाको हेलिकप्टरमार्फत उनीहरूलाई उद्धार गरी सुरक्षित स्थानमा पुर्‍याइएको हो ।

सैनिक जनसम्पर्क तथा सूचना निर्देशनालयका अनुसार उद्धार गरिएका २०८ जनामध्ये ४३ जना विदेशी नागरिक रहेका छन् । जसमा ३८ जना चिनियाँ र ५ जना भारतीय नागरिक रहेका छन् । सुरुङको बाहिरी भाग पत्ता लगाउन र भित्र थुनिएकाहरूलाई बाहिर निकाल्न सुरक्षा निकायको संयुक्त टोलीले ‘ड्रिलिङ मेसिन’ लगायतका अत्याधुनिक उपकरणहरूको प्रयोग गरिरहेको छ ।

बाढीबाट अति प्रभावित जिल्लाहरू रसुवा, नुवाकोट र धादिङमा नेपाली सेनाले सात हजारभन्दा बढी फौज परिचालन गरेको छ । सैनिक टोलीहरूले स्थानीय प्रशासन र अन्य सुरक्षा निकायसँगको समन्वयमा घाइतेहरूको खोज तथा उद्धार, आपत्कालीन स्वास्थ्य उपचार, राहत सामग्री वितरण र फेला परेका शवहरूको व्यवस्थापन कार्यलाई तीव्रता दिएका छन् ।

गत बुधबार आएको विनाशकारी बाढीले जलविद्युत् आयोजनाका संरचना र आवास क्षेत्रमा ठुलो क्षति पुर्‍याउँदा सुरुङभित्र कार्यरत कर्मचारी र कामदारहरू थुनिएका थिए । उनीहरूको सफल उद्धार भएसँगै बेपत्ता रहेका अन्यको खोजी कार्यलाई सुरक्षाकर्मीले अझ सशक्त बनाएका छन् ।