बर्लिन (एजेन्सी)। जर्मनीले आफ्नो देशको लेपजिग-हाले  विमानस्थलमा विस्फोटक पदार्थसहितको ड्रोनमार्फत आक्रमण प्रयास गरेको भन्दै रुसमाथि औपचारिक आरोप लगाएको छ। जर्मन खुफिया एजेन्सीले उक्त ड्रोन रुसी प्रविधिसँग मेल खाने निष्कर्ष निकालेपछि बर्लिनले कडा कूटनीतिक कदम चाल्ने घोषणा गरेको छ।

अन्तर्राष्ट्रिय समाचार संस्थाहरूका अनुसार, जर्मन आन्तरिक मामिला मन्त्री अलेक्ज्याण्डर डोब्रिन्टले मंगलबार विमानस्थलमा फेला परेको ड्रोन रुसी सैन्य प्रविधि र उपकरणसँग मिल्दोजुल्दो रहेको पुष्टि गर्नुभयो। यो घटना सार्वजनिक भएसँगै जर्मनीले बोन सहरमा रहेको रुसी वाणिज्य दूतावास र बर्लिनस्थित रुसी सांस्कृतिक केन्द्र (रुस हाउस) बन्द गर्ने निर्णय गरेको छ।

के भएको थियो लेपजिग विमानस्थलमा?
गत अगस्ट ४ को साँझ जर्मनीको प्रमुख कार्गो हब मानिने लेपजिग-हाले विमानस्थलमा युक्रेनी कम्पनी ‘एन्टोलोभ एयरलाइन्स’ को कार्गो विमान नजिकै विस्फोटकले भरिएको एउटा ड्रोन फेला परेको थियो। एक सतर्क कर्मचारीले उक्त ड्रोन देखेपछि विमानस्थलको कार्गो क्षेत्र केही समयका लागि बन्द गरिएको थियो। सुरक्षा विशेषज्ञहरूले रोबोटको प्रयोग गरी उक्त विस्फोटक पदार्थलाई निष्क्रिय पारेका थिए। सोही समयमा अर्को एउटा ड्रोन विमानसँग ठोक्किएर ध्वस्त भएको रिपोर्टमा उल्लेख छ।

जर्मनीको दाबी र प्रमाण
जर्मन मन्त्री डोब्रिन्टका अनुसार, अनुसन्धानमा भेटिएका प्रमाणहरूले रुसको संलग्नता पुष्टि गर्छन्। “प्रहरी अनुसन्धान, ड्रोनको बनावट र खुफिया जानकारीले यो आक्रमण प्रयासमा रुसी राज्य संयन्त्रको हात रहेको प्रमाणित हुन्छ,” उहाँले भन्नुभयो। जर्मनीले यो कार्य “तल्लो तहका एजेन्टहरू” मार्फत गराइएको तर यसको पछाडि उच्च प्राविधिक विशेषज्ञता रहेको दाबी गरेको छ।

जर्मनीको कडा कदम
रुसी कदमको विरोधमा जर्मनीले सेप्टेम्बर १८ देखि लागू हुने गरी बोनस्थित रुसी वाणिज्य दूतावास बन्द गर्ने भएको छ। साथै, जर्मन विदेश मन्त्रालयले रुसी राजदूतलाई बोलाएर कडा आपत्ति जनाएको छ। जर्मनीले युरोपेली युनियनलाई रुसविरुद्ध थप प्रतिबन्ध लगाउन र रुसी नागरिकहरूको प्रवेशमा कडाइ गर्न समेत सिफारिस गर्ने बताएको छ।

रुसको खण्डन
रुसले जर्मनीको यो आरोपलाई “हास्यास्पद” भन्दै अस्वीकार गरेको छ। बर्लिनस्थित रुसी दूतावासले जर्मनीको यो कदमले गम्भीर परिणाम निम्त्याउने चेतावनी दिएको छ। रुसी राष्ट्रपति भ्लादिमिर पुटिनले जर्मन चान्सलर फ्रेडरिक मर्जको सरकारले आफ्नो आन्तरिक राजनीतिक समस्या र घट्दो लोकप्रियताबाट जनताको ध्यान हटाउन रुसमाथि झुटा आरोप लगाएको टिप्पणी गर्नुभएको छ। पुटिनले जर्मनीले रुसलाई फसाउन आफैँ प्रमाणहरू ‘प्लान्ट’ गरेको हुनसक्ने आशंका समेत व्यक्त गर्नुभएको छ।

युरोपमा बढ्दो तनाव र हाइब्रिड युद्ध
यस घटनालाई नेटो र युरोपेली मुलुकहरूले रुसको “हाइब्रिड युद्ध”  को हिस्साका रूपमा लिएका छन्। पोल्याण्ड, इटाली, बेलायत र चेक गणतन्त्र लगायतका राष्ट्रहरूले जर्मनीको दाबीलाई समर्थन गरेका छन्। युक्रेनमाथि रुसको पूर्णकालीन आक्रमण सुरु भएयता युरोपभरि करिब २०० वटा यस्ता संदिग्ध तोडफोड, आगजनी र साइबर आक्रमणका घटनाहरू रेकर्ड गरिएका छन्।

राजनीतिक विश्लेषकहरूका अनुसार, जर्मनीको स्याक्सनी-अनहाल्ट प्रान्तमा हुन लागेको चुनावको मुखमा यस्ता घटनाहरू हुनु अर्थपूर्ण छ। रुससँग नजिक हुन चाहने र युक्रेन सहायताको विरोधी मानिने अति-दक्षिणपन्थी दल ‘अल्टरनेटिभ फर जर्मनी’ को बढ्दो प्रभावका बीच जर्मनीले यो सुरक्षा चुनौतीको सामना गरिरहेको छ।

युक्रेनले भने जर्मनीको यस कदमको स्वागत गरेको छ। बर्लिनका लागि युक्रेनी राजदूत ओलेक्सी माकेयेभले रुसी हस्तक्षेपविरुद्ध जर्मनीले देखाएको दृढताको प्रशंसा गर्नुभएको छ।