काठमाडौँ, १८ भदौ । काठमाडौँ महानगरपालिकाकी कार्यवाहक प्रमुख सुनिता डङ्गोलले काठमाडौँको मौलिक पहिचान र परम्परागत संस्कृतिलाई जोगाउनु स्थानीय सरकारको प्राथमिकता रहेको बताउनुभएको छ । काठमाडौँ महानगरपालिका र नेपाल परम्परागत बौद्ध धर्म सङ्घको संयुक्त आयोजनामा बिहीबार राष्ट्रिय सभागृहमा सम्पन्न ‘सामूहिक पञ्चदान अभ्यास’ कार्यक्रमलाई सम्बोधन गर्दै उहाँले यस्तो बताउनुभएको हो ।

कार्यक्रममा बोल्दै कार्यवाहक प्रमुख डङ्गोलले बौद्ध धर्म र संस्कृतिसँग जोडिएको पञ्चदान पर्वको विशिष्ट महत्त्व रहेको उल्लेख गर्नुभयो । “पञ्चदान केवल दान गर्ने प्रक्रिया मात्र नभई यो हाम्रो सभ्यता र सद्भावको प्रतीक पनि हो,” उहाँले भन्नुभयो, “यस्ता परम्पराहरूलाई सामूहिक रूपमा अभ्यास गर्दा यसले समाजलाई एकताबद्ध बनाउन र नयाँ पुस्तालाई आफ्नो संस्कारप्रति जिम्मेवार बनाउन मद्दत गर्दछ ।”

बौद्ध धर्मावलम्बीहरूले विशेष श्रद्धाका साथ मनाउने पञ्चदानको अवसरमा आयोजना गरिएको यो सामूहिक अभ्यासले सांस्कृतिक पर्यटन प्रवर्द्धनमा समेत टेवा पुग्ने उहाँको विश्वास थियो । महानगरपालिकाले यहाँका मूर्त तथा अमूर्त सम्पदाहरूको संरक्षण र संवर्द्धनका लागि सधैँ समुदायसँग सहकार्य गर्ने प्रतिबद्धता समेत उहाँले दोहोर्‍याउनुभयो ।

नेपाल परम्परागत बौद्ध धर्म सङ्घका प्रतिनिधिहरूले पनि महानगरपालिकासँगको सहकार्यले सांस्कृतिक गतिविधिहरूलाई थप व्यवस्थित बनाउन सहयोग पुगेको बताएका थिए । कार्यक्रममा विभिन्न क्षेत्रका बौद्ध विद्वान्, गुरुहरू र स्थानीय बासिन्दाहरूको उल्लेख्य सहभागिता रहेको थियो ।