मस्को / ब्रसेल्स । युक्रेन युद्धका कारण पश्चिम र रुसबीचको तनाव उत्कर्षमा पुगेका बेला मस्कोले बाल्टिक सागरस्थित आफ्नो रणनीतिक क्षेत्र ‘कालिनिनग्राद’ (Kaliningrad) माथि नाकाबन्दी गर्ने कुनै पनि प्रयास भए कडा सैन्य प्रतिवाद गर्ने चेतावनी दिएको छ। रुसले नाटो सदस्य राष्ट्रहरूलाई एक कूटनीतिक दस्ताबेज पठाउँदै यदि पश्चिमी गठबन्धनले हवाई तथा नौसैनिक नाकाबन्दीको असफल प्रयास गरेमा परमाणु हतियारसहितको सम्पूर्ण सैन्य शस्त्रागार प्रयोग गर्न पछि नपर्ने चेतावनी दिएको अन्तर्राष्ट्रिय समाचार माध्यमहरूले जनाएका छन्।

रूसको विदेश मन्त्रालयमार्फत पठाएको भनिएको उक्त कूटनीतिक ज्ञापनपत्र  मा मस्कोसँग “नाटोले कालिनिनग्रादको घेराबन्दी र नाकाबन्दीको तीव्र तयारी गरिरहेको” भरपर्दो गुप्तचर जानकारी रहेको दाबी गरिएको छ। पोल्यान्ड र लिथुआनियाबीचमा अवस्थित कालिनिनग्राद रुसको मुख्य भूभागबाट छुट्टिएको एक अति संवेदनशील बाह्य क्षेत्र (Exclave)

नाटोको कडा प्रतिक्रिया: “पुटिनले कहिल्यै जित्न सक्दैनन्”

रुसको यो कूटनीतिक चेतावनी र परमाणु धम्कीप्रति नाटोले कडा आपत्ति जनाएको छ। नाटोका महासचिव मार्क रुट्टे  ले रुसी चेतावनीको खण्डन गर्दै नाटो पूर्ण रूपमा एक रक्षात्मक गठबन्धन भएको स्पष्ट पार्नुभएको छ।

महासचिव रुट्टेले रुसलाई लक्षित गर्दै भन्नुभयो, “रुसले आफ्नो अनावश्यक परमाणु धम्की तत्काल बन्द गर्नुपर्छ।” साथै, रुसी राष्ट्रपति भ्लादिमिर पुटिनलाई चेतावनी दिँदै उहाँले भन्नुभयो, “पुटिनलाई राम्रोसँग थाहा छ कि नाटोविरुद्धको कुनै पनि प्रत्यक्ष सैन्य द्वन्द्व वा वृद्धिमा उनी कहिल्यै विजयी हुन सक्दैनन्।”

बढ्दो भूराजनीतिक तनाव र साढे चार वर्षको युक्रेन युद्ध

युक्रेनमाथि रुसको पूर्ण आक्रमण सुरु भएको साढे चार वर्षभन्दा बढी समय भइसकेको छ। यो द्वन्द्व अहिले युक्रेनको सिमाना मात्र नभई छिमेकी युरोपेली देशहरूसम्म फैलिने जोखिम बढेको छ।

पछिल्ला केही साताहरूमा पोल्यान्डले आफ्नो हवाई क्षेत्रमा सुरक्षा सतर्कता उच्च बनाएको छ भने डेनिस अधिकारीहरूले बाल्टिक सागरमा गस्ती गरिरहेको डेनिस सैन्य हेलिकप्टर नजिकै एक रुसी युद्धपोतले चेतावनीस्वरूप फ्लेयर (Flares) प्रहार गरेको खुलासा गरेका थिए। यस प्रकारका साना तर संवेदनशील घटनाहरूले नाटो र रुसबीच प्रत्यक्ष झडपको खतरा बढाएको छ, जसले गर्दा विश्व समुदायको ध्यान कालिनिनग्राद क्षेत्रतर्फ केन्द्रित भएको छ।