कीभ । मध्य युक्रेनको शहर निप्रोको मुख्य रेल स्टेसनमा बिहीबार रुसी जेट-सञ्चालित ड्रोनले आक्रमण गर्दा कम्तीमा १४ जनाको मृत्यु भएको स्थानीय अधिकारीहरूले जानकारी दिएका छन्। निप्रोपेत्रोभस्क क्षेत्रीय प्रमुख ओलेक्सान्द्र हान्झाका अनुसार आक्रमणमा परी थप कम्तीमा १४ जना घाइते भएका छन्, जसमा ११ वर्षीय बालक पनि छन्।

युक्रेनको सरकारी रेल सञ्चालक युक्रजालिजनित्सियाका अनुसार दक्षिणी शहर जापोरिजिया जाने यात्रुवाहक रेल प्लेटफर्ममा रोकिएका बेला ड्रोन प्रहार भएको थियो। रेलका प्रमुख ओलेक्सान्द्र पेर्त्सोभस्कीले निप्रोमा आक्रमणको उच्च जोखिम रहेको चेतावनी पहिल्यै जारी गरिएको बताए। तर “दुर्भाग्यवश प्लेटफर्ममा अझै ठूलो संख्यामा मानिस थिए,” उनले भने।

निप्रोका मेयर बोरिस फिलातोभले घटनालाई “त्रासदी” भन्दै ड्रोन नागरिक विद्युतीय रेलमा बजारिएको बताए। युक्रेनी उद्धार सेवाले सार्वजनिक गरेका तस्बिरमा प्लेटफर्ममा ठूलो प्वाल परेको र शवहरू छरिएको (अस्पष्ट पारिएको) देखिन्छ। नजिकै विस्फोटबाट क्षति पुगेको र झ्यालका सिसा फुटेको रेल पनि देखिएको छ।

जेलेन्स्कीको प्रतिक्रिया

युक्रेनी राष्ट्रपति भोलोदिमिर जेलेन्स्कीले “रुसीहरूले सामान्य यात्रुवाहक र उपनगरीय रेल उभिएको प्लेटफर्ममा ड्रोन प्रहार गरे” भने। उनले अमेरिका, युरोप र जी-७ राष्ट्रहरूलाई रुसविरुद्ध थप प्रतिबन्ध लगाउन आग्रह गरे। साथै यही महिना अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच भएको विवादास्पद सम्झौताको आलोचना दोहोर्याए, जसअन्तर्गत रुसविरुद्धका केही प्रतिबन्ध खुकुलो पारी अमेरिकालाई रुसी डिजेल आयात गर्न अनुमति दिइएको छ।

रुसी सेनाले यस घटनामा सार्वजनिक टिप्पणी गरेको छैन। रुसले युक्रेनको विशाल रेल सञ्जालमा पटक-पटक आक्रमण गर्दै आएको छ, तर मस्कोले जानाजानी नागरिकलाई निशाना बनाएको आरोप अस्वीकार गर्दै आएको छ। रुसी रक्षा मन्त्रालयका अनुसार रेलमार्गमा गरिने आक्रमण सैन्य कर्मचारी र हतियार ढुवानीमा प्रयोग हुने पूर्वाधारलाई लक्षित छ।

चेर्निहिभमा दुई किशोरीको मृत्यु

उत्तरी युक्रेनको चेर्निहिभ शहरको केन्द्रमा रुसी मिसाइल आक्रमणमा १५ वर्षका दुई बालिकाको मृत्यु भएको क्षेत्रीय प्रमुख व्याचेस्लाभ चौसले जनाएका छन्। आक्रमणमा बालबालिकासहित कम्तीमा ११ जना घाइते भएका छन्।

ओलेश्कीमा संघर्षविराम

यी आक्रमण २०२२ देखि रुसी कब्जामा रहेको घेराबन्दीमा परेको ओलेश्की शहरमा नाजुक स्थानीय संघर्षविराम कायम राख्ने प्रयासका बीचमा भएका हुन्। त्यहाँका बासिन्दा खाना, पानी, औषधि र बिजुलीविना फसेका छन्। युक्रेनी मानवअधिकार लोकपाल दिमित्रो लुबिनेत्सले टेलिग्राममा युद्धविराम तेस्रो दिनसम्म कायम रहेको बताउँदै बेलारुस र रुस हुँदै युक्रेनी प्रतिनिधिमण्डलसहित ओलेश्की प्रस्थान गरेको जानकारी दिए।

मस्कोमा ड्रोन आक्रमण

रुसी समाचार संस्था तास का अनुसार रुस-अफ्रिका शिखर सम्मेलन जारी रहेका बेला क्रेमलिनले मस्कोमा भएको युक्रेनी ड्रोन आक्रमणको निन्दा गरेको छ। दुई दिने सम्मेलनमा ४८ देशका अफ्रिकी नेता र सरकारी प्रतिनिधिमण्डल सहभागी छन्। मस्कोका मेयरका अनुसार राति राजधानी क्षेत्रतर्फ ६१३ युक्रेनी ड्रोन प्रक्षेपण गरिएका थिए, जसमध्ये अधिकांश उडानकै क्रममा खसालिए।

रेल पूर्वाधारमा आक्रमण बढ्दो

रुसी आक्रमणका कारण यात्रु र रेल पूर्वाधार दुवै जोखिममा परेका छन्। एएफपीले उपलब्ध गराएको युक्रजालिजनित्सियाको तथ्यांकअनुसार पूर्ण स्तरको आक्रमण सुरु भएयता ५२१ वटा इन्जिन क्षतिग्रस्त भएका छन्, जसमध्ये करिब ६० प्रतिशत यसै वर्ष प्रहार गरिएका हुन्। रेल सुविधामाथिको कुल आक्रमण सन् २०२५ मा १,२०६ बाट यस वर्ष अहिलेसम्म १,७०० पुगेको छ।

पछिल्ला हप्ताहरूमा युक्रेनका पूर्वाधारमाथि व्यापक आक्रमण भएको देखिन्छ। कीभमा दुईवटा पुलमा आक्रमण भएको र एक मेट्रो रेल प्रहारमा परेको थियो।

स्रोत: बीबीसी, एएफपी, तास