एनपिएल एलिमिनेटर: फाइनलको आशा जीवित राख्न आज काठमाडौँ र लुम्बिनीबीच ‘गर या मर’को भिडन्त

काठमाडौँ, २४ मङ्सिर । नेपाल प्रिमियर लिग (एनपिएल) अन्तर्गत आज हुने महत्त्वपूर्ण ‘एलिमिनेटर’ खेलमा काठमाडौँ गोर्खाज र लुम्बिनी लायन्स एक-अर्काविरुद्ध मैदान उत्रँदै छन्। कीर्तिपुरस्थित त्रिभुवन अन्तर्राष्ट्रिय क्रिकेट मैदानमा आज अपराह्न ४:०० बजे सुरु हुने यो खेल दुवै टोलीका लागि ‘गर या मर’को अवस्थामा रहेको छ।

लिग चरणको प्रदर्शनका आधारमा काठमाडौँ गोर्खाज अङ्क तालिकाको तेस्रो र लुम्बिनी लायन्स चौथो स्थानमा रहँदै प्लेअफमा प्रवेश गरेका हुन्। लिग चरणको भेटमा काठमाडौँले लुम्बिनीलाई २२ रनले पराजित गरेको इतिहास रहेकाले आजको खेलमा काठमाडौँ उच्च मनोबलका साथ मैदान प्रवेश गर्नेछ। यद्यपि, लुम्बिनी लायन्स पनि बदला लिँदै अर्को चरणमा पुग्न कडा चुनौती दिने तयारीमा छ।

आजको खेलमा विजयी हुने टोलीले फाइनल प्रवेशका लागि दोस्रो क्वालिफायरमा विराटनगर किङ्सको सामना गर्नेछ। पहिलो क्वालिफायरमा सुदूरपश्चिम रोयल्ससँग पराजित भएको विराटनगरले फाइनल पुग्ने अर्को अवसरका रूपमा दोस्रो क्वालिफायर खेल्न लागेको हो।

आज पराजित हुने टोली भने प्रतियोगिताबाट सिधै बाहिरिनेछ। तसर्थ, प्रतियोगितामा आफ्नो अस्तित्व जोगाइराख्न र उपाधि यात्रालाई निरन्तरता दिन दुवै टोलीलाई आजको खेल जित्नैपर्ने दबाब छ। विजयी टोलीले भोलि नै विराटनगरसँग दोस्रो क्वालिफायर खेल्ने तालिका रहेको छ।