अमेरिकी खेलाडीको प्रतिबन्ध फिफाद्वारा खारेज, विश्वकपको निष्पक्षतामाथि गम्भीर बहस सुरु

एजेन्सी, २३ असार । फिफाले अमेरिकी स्ट्राइकर फोलारिन बालोगुनमाथिको प्रतिबन्ध अन्तिम समयमा फिर्ता लिने विवादास्पद निर्णय गरेसँगै विश्वकप फुटबलको निष्पक्षता, नियमहरूको समान प्रयोग र राजनीतिक प्रभावका विषयमा अन्तर्राष्ट्रिय फुटबल वृत्तमा गम्भीर बहस सुरु भएको छ। अमेरिकी राष्ट्रपति डोनाल्ड ट्रम्प र फिफा अध्यक्ष जियानी इन्फान्टिनोबीच भएको टेलिफोन संवादपछि फिफाले यस्तो निर्णय लिएको हो।

बोस्निया–हर्जेगोभिनाविरुद्धको खेलमा गम्भीर फाउल गरेपछि बालोगुनले रातो कार्ड पाएका थिए। सामान्यतः रातो कार्ड पाउँदा कम्तीमा एक खेलको प्रतिबन्ध लाग्ने नियम भए पनि फिफाको अनुशासनात्मक समितिले आइतबार उनको प्रतिबन्ध फुकुवा गर्दै ४० हजार अमेरिकी डलर जरिवाना मात्र तोकेको थियो। प्रतिबन्ध फुकुवा भएपछि बालोगुन बेल्जियमविरुद्धको महत्त्वपूर्ण नकआउट खेलमा मैदान उत्रिएका थिए। यद्यपि, बालोगुन टोलीमा फर्किए पनि अमेरिका बेल्जियमसँग ४–१ ले पराजित हुँदै प्रतियोगिताबाट बाहिरियो।

युरोपेली फुटबल महासङ्घ (युईएफए) ले फिफाको यस कदमको कडा निन्दा गर्दै यसलाई ‘लक्ष्मण रेखा पार गरेको’ र अभूतपूर्व एवं अन्यायपूर्ण निर्णयको संज्ञा दिएको छ। बेल्जियम फुटबल सङ्घले पनि बालोगुनलाई खेलाइएको विषयमा औपचारिक आपत्ति जनाए पनि फिफाको अपिल समितिले खेल सुरु हुनु केही घण्टाअघि मात्र बेल्जियमको दाबी खारेज गरिदिएको थियो। बेल्जियमले यस मुद्दालाई स्विट्जरल्यान्डस्थित खेलकुद मध्यस्थता अदालत (सीएएस) मा लैजाने विकल्प खुला राखेको छ।

फिफाका पूर्वअध्यक्ष सेप ब्लाटरले सामाजिक सञ्जालमार्फत रातो कार्डको सजाय राजनीतिक फोन कलका आधारमा नभई नियम र प्रमाणका आधारमा स्वतन्त्र निकायले तय गर्नुपर्ने टिप्पणी गरेका छन्। यसैगरी, नर्वेका प्रशिक्षक स्टाले सोलबाक्केन र इङ्गल्यान्डका प्रशिक्षक थोमस टुचेलले पनि फिफाको यस निर्णयले भविष्यमा अनुशासनसम्बन्धी नियमहरू कार्यान्वयनमा अन्योल सिर्जना गर्ने चिन्ता व्यक्त गरेका छन्।

फिफाले भने युरोपका शीर्ष लिगहरूमा पनि रातो कार्डको कानुनी पुनरावलोकन हुने गरेको दाबी गर्दै आफ्नो निर्णयको बचाउ गरेको छ। यता, अमेरिकी राष्ट्रपति ट्रम्पले आफूले फिफा अध्यक्ष इन्फान्टिनोलाई फोन गरेर ‘गलत निर्णय’ को पुनरावलोकन गर्न आग्रह गरेको स्वीकार गरे पनि कुनै दबाब नदिएको दाबी गरेका छन्। अध्यक्ष इन्फान्टिनोले फिफाका न्यायिक निकायहरू स्वायत्त रहेको र ट्रम्पसँग सामान्य कानुनी प्रक्रियाबारे मात्र कुराकानी भएको स्पष्ट पारेका छन्।

यसअघि पनि क्रिस्टियानो रोनाल्डो, मोइसेस काइसेडो र निकोलस ओटामेन्डी जस्ता स्टार खेलाडीहरूलाई फिफाले नरम सजाय दिएको भन्दै आलोचना हुने गरेको थियो। तर, दक्षिण अफ्रिकाका थेम्बा ज्वाने जस्ता खेलाडीले भने समान प्रकृतिको फाउलमा कडा सजाय भोगेका छन्। यस घटनाले विश्व फुटबलमा शक्ति र राजनीतिक पहुँचका आधारमा नियम परिवर्तन हुने गम्भीर नजिर बस्न सक्ने भन्दै सर्वत्र चिन्ता व्यक्त गरिएको छ।