सिन्धुपाल्चोक, ४ साउन । अविरल वर्षाका कारण सिन्धुपाल्चोकको जुरेमा पुरानै पहिरो गएको स्थानबाट पुनः लेदोसहितको पहिरो खस्दा अरनिको राजमार्ग पूर्ण रूपमा अवरुद्ध भएको छ।

शनिबार रातिदेखि अवरुद्ध राजमार्गका कारण चीनसँगको प्रमुख व्यापारिक नाका तातोपानीसँगको सडक सम्पर्क टुटेको छ।

जिल्ला प्रहरी कार्यालय, सिन्धुपाल्चोकका प्रमुख (एसपी) रामेश्वर कार्कीका अनुसार, पहिरो पन्छाउन एक्स्काभेटर र लोडर जस्ता उपकरणहरू प्रयोग गरी प्रयास भइरहेको छ। सडक अवरुद्ध हुँदा तातोपानी नाकाबाट सामग्री बोकेर आएका र काठमाडौंबाट नाकातर्फ जाँदै गरेका सयौँ कन्टेनर तथा अन्य ठूला सवारी साधनहरू बाटोमै अलपत्र परेका छन्।

पहिरोले जुरेमा बिजुलीको पोल ढालेको छ भने नजिकैको महभीर भन्ने स्थानमा सडक भासिएको छ, जसले यात्रालाई थप जोखिमपूर्ण बनाएको छ। केही मोटरसाइकल चालकहरूले भने जोखिम मोलेरै खोलाको किनारबाट यात्रा गरिरहेका छन् ।

यो अवरोधले सीमावर्ती तातोपानी, त्रिपुरासुन्दरी गाउँपालिका र बाह्रबीसे नगरपालिकाका हजारौँ स्थानीय बासिन्दा प्रत्यक्ष प्रभावित भएका छन् ।