जेन–जी आन्दोलनमा व्यक्तिको घर तोडफोड र आगजनी गर्ने रास्वपाका कार्यकर्ता पक्राउ

कास्की, २५ कात्तिक । जेन–जी आन्दोलनका क्रममा पोखरामा माइकिङ गर्दै विभिन्न व्यक्तिको घर तोडफोड र आगजनीकाे अपिल गर्ने राष्ट्रिय स्वतन्त्र पार्टी (रास्वपा) का कार्यकर्ता विक्रम भन्ने अभिमन्यु पाण्डे पक्राउ परेका छन् ।

कास्कीका जिल्ला प्रहरी प्रवक्ता डीएसपी हरि बस्नेतका अनुसार पृथ्वीचोकमा रहेको शहीद लखन थापाको शालिक फुटाउने र व्यवसायी बिन्दु थापाको घरमा आगजनी गर्नेसम्मको भूमिकामा उनी सक्रिय थिए । प्रहरीले मंगलबार बिहान उनलाई पक्राउ गरेको हो ।

पाण्डे पोखरामा सञ्चालित संघर्षशील सहकारीका अध्यक्ष थिए । आफैँ अध्यक्ष भएर संस्थाको रकम अपचलन गरेपछि उनी प्रहरीले यसअघि नै पक्राउ गरिएका व्यक्ति हुन् । उक्त मुद्दामा पक्राउ परेपछि उनी धरौटीमा छुटेका थिए ।

उनका विरुद्ध आपराधिक उपद्रव मुद्दा चलाइने प्रवक्ता डीएसपी बस्नेतले बताए ।