पृथ्वी राजमार्गको वैकल्पिक ‘बुद्धसिंह मार्ग’ निर्माण सुस्त : ४० प्रतिशत भौतिक प्रगति

काठमाडौँ, मंसिर ५ । पोखरा र काठमाडौँलाई तराईसँग जोड्ने मुख्य लाइफलाइन मानिने पृथ्वी राजमार्गको भरपर्दो विकल्पका रूपमा हेरिएको ‘बुद्धसिंह मार्ग’को निर्माण कार्य सुस्त गतिमा अघि बढेको छ। तनहुँ सदरमुकाम दमौलीदेखि चितवनको घुमाउनेघाटसम्म जोड्ने ३४ किलोमिटर लामो यस सडक खण्डमा हालसम्म केवल ४० प्रतिशत मात्र भौतिक प्रगति भएको छ ।

पूर्वाधार विकास कार्यालय तनहुँले दिएको जानकारी अनुसार, निर्माणाधीन ३४ किलोमिटर सडक खण्डमध्ये चालु आर्थिक वर्षमा १० किलोमिटर सडक कालोपत्रे (पक्की) गर्ने लक्ष्य राखिएको छ। कार्यालयकी इन्जिनियर सुष्मा पाण्डेका अनुसार व्यास नगरपालिका-१ स्थित दमौली बसपार्कदेखि आँबुखैरेनी गाउँपालिका-५ स्थित घुमाउने घाटसम्मको खण्डमा काम भइरहेको छ। भौगोलिक कठिनाइ भएको स्थानमा १ किलोमिटर सडक ढलान (कङ्क्रिट) गर्ने योजना रहेकोमा हालसम्म ५ सय मिटर ढलानको काम सम्पन्न भइसकेको छ ।

सडकको स्तरोन्नति अन्तर्गत दमौली बसपार्कदेखि १० किलोमिटर दुरीमा रहेको सुँडेको पुलसम्मको सडकखण्ड सात मिटर चौडा हुनेछ । सडकलाई दिगो र बलियो बनाउन हाल विभिन्न पूर्वाधारका कामहरू भइरहेका छन्। इन्जिनियर पाण्डेका अनुसार अहिले विशेष गरी वर्षाको पानी निकासका लागि नाला निर्माण, आवश्यक ‘स्ट्रक्चर’ (संरचना) निर्माण र ‘सबग्रेडिङ’ लगायतका कार्यहरू जारी छन् ।

सङ्घीय सरकारको बहुवर्षीय योजना अन्तर्गत परेको यस सडक आयोजनाका लागि  ३४ करोड २७ लाख ५४ हजार ५६१ रुपियाँ बजेट विनियोजन गरिएको छ । राष्ट्रिय महत्त्वको आयोजना भए पनि निर्माणको गति सुस्त हुँदा स्थानीय बासिन्दा र सरोकारवालाहरूले चिन्ता व्यक्त गरेका छन् ।

यो सडक सम्पन्न भएपछि तनहुँको दमौलीबाट घुमाउने हुँदै चितवनको नारायणगढ पुग्न पृथ्वी राजमार्ग (मुग्लिन) को बाटो भन्दा करिब २५ किलोमिटर छोटो पर्नेछ । यसले मुग्लिन-नारायणगढ सडक खण्डको सवारी चाप घटाउन र यात्रा समय बचत गर्न महत्त्वपूर्ण भूमिका खेल्ने अपेक्षा गरिएको छ ।