ट्रम्पको नयाँ सुरक्षा रणनीति रुसको ‘भिजन’ सँग मेल खान्छ : मस्को

मस्को/वासिङ्टन, एजेन्सी ।
रुसले अमेरिकी राष्ट्रपति डोनाल्ड ट्रम्पको नयाँ राष्ट्रिय सुरक्षा रणनीतिको स्वागत गरेको छ। मस्कोले अमेरिकाको यो नयाँ दस्तावेज आफ्नो दृष्टिकोण (भिजन) सँग “धेरै हदसम्म समान” रहेको प्रतिक्रिया दिएको छ।

अमेरिकी प्रशासनले हालै सार्वजनिक गरेको ३३ पृष्ठ लामो उक्त दस्तावेजमा युरोपले “सभ्यतागत अस्तित्व मेटिने” (Civilisational Erasure) संकट सामना गरिरहेको उल्लेख छ। विशेष कुरा त के छ भने, यस प्रतिवेदनमा रुसलाई अमेरिकाको सुरक्षा चुनौती वा खतराको रूपमा चित्रण गरिएको छैन।

रुसप्रति नरम, युरोपप्रति आक्रामक
विदेशी प्रभाव नियन्त्रण, बसाइँसराइ (Migration) को अन्त्य र युरोपेली संघ (ईयू) को कथित ‘सेन्सरसिप’ को विरोधलाई प्राथमिकतामा राखेको यो रणनीतिले परम्परागत अमेरिकी विदेश नीतिमा ठूलो बदलाव ल्याएको छ।

क्रेमलिनका प्रवक्ता दिमित्री पेस्कोभले रुसी समाचार संस्था ‘टास’ सँग कुरा गर्दै भने, “अमेरिकाले गरेका नीतिगत समायोजनहरू हाम्रो दृष्टिकोणसँग धेरै हदसम्म मेल खान्छन्। हामी यसलाई सकारात्मक कदम ठान्छौं।” यद्यपि, मस्कोले निष्कर्षमा पुग्नुअघि दस्तावेजको विस्तृत विश्लेषण गर्ने उनले बताए।

दस्तावेजमा युक्रेन द्वन्द्व अन्त्य गर्ने अमेरिकी प्रयासमा युरोपेली संघ बाधक बनेको आरोप लगाइएको छ। साथै, “रुससँग रणनीतिक स्थिरता पुनःस्थापना” गर्दा युरोपेली अर्थतन्त्रलाई टेवा पुग्ने तर्क अमेरिकाले अघि सारेको छ। यसले रुसप्रति अमेरिकाको भाषा नरम भएको र यसले युक्रेनलाई सहयोग गरिरहेका युरोपेली शक्तिहरूलाई कमजोर बनाउन सक्ने विश्लेषण गरिएको छ।

‘२० वर्षमा युरोप चिनिने छैन’
अमेरिकी प्रतिवेदनले “पश्चिमी पहिचान” को पुनरुत्थानमा जोड दिँदै युरोपको भविष्यबारे निराशाजनक प्रक्षेपण गरेको छ। प्रतिवेदनमा भनिएको छ, “२० वर्ष वा सोभन्दा कम समयमा युरोप चिन्नै नसकिने अवस्थामा पुग्नेछ।” अमेरिकाले युरोपका “देशभक्त पार्टीहरू” (विशेषतः दक्षिणपन्थी शक्तिहरू) को प्रशंसा गर्दै आफ्ना राजनीतिक मित्रहरूलाई यस्तो भावना जागृत गराउन प्रोत्साहन गर्ने उल्लेख गरेको छ।

युरोपेली र अमेरिकी नेताहरूको तीव्र आलोचना
ट्रम्पको यो रणनीति सार्वजनिक भएलगत्तै युरोपेली नेता र अमेरिकी डेमोक्र्याटहरूले यसको कडा आलोचना गरेका छन्।

पोल्याण्डका प्रधानमन्त्री डोनाल्ड टस्कले सामाजिक सञ्जालमार्फत सन्देश दिँदै भनेका छन्, “प्रिय अमेरिकी मित्रहरू, युरोप तपाईंहरूको सबैभन्दा नजिकको सहयोगी हो, समस्या होइन।”

स्विडेनका पूर्व प्रधानमन्त्री कार्ल बिल्डले यो दस्तावेजलाई “चरम दक्षिणपन्थीभन्दा पनि अझ दक्षिणतर्फ ढल्किएको” टिप्पणी गरेका छन्। जर्मन विदेश मन्त्रालयका अधिकारीहरूले अभिव्यक्ति स्वतन्त्रता र लोकतान्त्रिक समाजको संगठन जस्ता विषय सुरक्षा रणनीतिमा नपर्ने भन्दै असन्तुष्टि जनाएका छन्।

उता, अमेरिकाभित्रै डेमोक्र्याट सांसदहरूले यो नीतिले “दशकौंदेखिको अमेरिकी नेतृत्व र मूल्य-मान्यतालाई ध्वस्त पार्ने” र अमेरिकाको विश्वव्यापी प्रतिष्ठामा आँच आउने चेतावनी दिएका छन्। सांसद जेसन क्रोले यसलाई “विनाशकारी” भनेका छन्।

अन्य प्राथमिकताहरू
रणनीतिमा “अमेरिका पहिलो” (America First) नीति अन्तर्गत क्यारिबियन र पूर्वी प्रशान्त महासागरमा लागुऔषध ओसारपसार रोक्न भेनेजुएलामा सैन्य कारबाहीको सम्भावना समेत औंल्याइएको छ। साथै, जापान, दक्षिण कोरिया, अष्ट्रेलिया र ताइवानलाई रक्षा खर्च बढाउन दबाब दिइएको छ।

Leave a Reply

Your email address will not be published. Required fields are marked *