बङ्गलादेशमा संवैधानिक सुधारको पक्षमा जनमत: निर्वाचनमा बिएनपीकाे बहुमत

ढाका, १ फागुन । बङ्गलादेशमा सम्पन्न ऐतिहासिक जनमतसङ्ग्रहमा त्यहाँका नागरिकले संवैधानिक सुधारको पक्षमा भारी मतदान गरेका छन् । प्रारम्भिक विवरणअनुसार ६५.३ प्रतिशत मतदाताले प्रस्तावित ८४ बुँदे ‘जुलाई चार्टर’ सुधार प्रस्तावलाई अनुमोदन गरेका हुन् ।

सन् २०२४ को जनविद्रोहपछि प्रस्तावित यो राजनीतिक रूपान्तरणलाई बङ्गलादेशी नागरिकले ठूलो जनसमर्थन दिएको रूपमा विश्लेषण गरिएको छ ।

‘जुलाई चार्टर’ नामक सुधार प्रस्तावले भविष्यमा मुलुकमा फेरि अधिनायकवादी शासन दोहोरिन नदिन विभिन्न संरचनात्मक परिवर्तनको खाका अघि सारेको छ । डेली स्टारका अनुसार २७ लाखभन्दा बढी मतदाता सुधारको पक्षमा उभिएका छन् ।

प्रस्तावित सुधारहरूमा कार्यवाहक सरकार गठनको स्पष्ट व्यवस्था, पूर्ण स्वतन्त्र निर्वाचन आयोग स्थापना, द्विसदनीय संसद् प्रारम्भ, प्रधानमन्त्रीको कार्यकालमा सीमा निर्धारण, राष्ट्रपतिको अधिकार पुनर्संरचना, न्यायपालिकाको स्वतन्त्रता सुदृढीकरण तथा संसद्मा महिलाको प्रतिनिधित्व वृद्धि जस्ता प्रावधान समावेश छन् । प्रारम्भिक नतिजाले यी विषयमा मतदाताहरूको सकारात्मक धारणा देखाएको छ ।

निर्वाचनतर्फ प्रारम्भिक गणनाले बङ्गलादेश नेसनलिस्ट पार्टी (बिएनपी) अग्रस्थानमा रहेको देखाएको छ। विभिन्न सञ्चारमाध्यमका अनुमानअनुसार २९९ प्रत्यक्ष निर्वाचित सिटमध्ये बिएनपी र उसका सहयोगीहरूले १८१ सिट जितेका छन् भने जमात र उसका साझेदारहरूले ६१ सिट प्राप्त गरेका छन्। २४९ निर्वाचन क्षेत्रमा मतगणना सकिएको र ५० क्षेत्रमा प्रक्रिया जारी रहेको डेली स्टारले जनाएको छ। यद्यपि, निर्वाचन आयोगले आधिकारिक नतिजा सार्वजनिक गर्न बाँकी रहेको छ।

पूर्वप्रधानमन्त्री खालिदा जियाको निधन र शेख हसिनाको अवामी लिगमाथि प्रतिबन्ध लगाएपछि सम्पन्न भएको यो निर्वाचन तथा जनमतसङ्ग्रहलाई बङ्गलादेशको राजनीतिक पुनर्संरचनातर्फको महत्त्वपूर्ण कदमका रूपमा विश्लेषण गरिएको छ । निर्वाचन आयोगले औपचारिक घोषणा गर्ने तयारी गरिरहेको छ ।