काठमाडौँ, १७ चैत । हाल नेपालमा पश्चिमी वायुका साथै स्थानीय वायुको आंशिक प्रभाव रहेकाले देशका विभिन्न भागमा मौसमी गतिविधि सक्रिय भएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार आज पहाडी तथा हिमाली भेगमा बदली हुनुका साथै वर्षा र हिमपातको सम्भावना देखिएको छ।

अहिले लुम्बिनी र सुदूरपश्चिम प्रदेशलगायत अन्य प्रदेशका पहाडी भू–भागमा साधारणतया बदली (बादल लाग्ने) रहेको छ भने गण्डकी प्रदेशका पहाडी भेगका एक–दुई स्थानमा हल्का वर्षा भइरहेको छ। देशका बाँकी हिस्सामा भने मौसम मुख्यतया सफा रहेको छ।

महाशाखाका अनुसार आज दिउँसो कोशी र मधेश प्रदेशसहित देशका पहाडी तथा हिमाली भू–भागमा साधारणतया बदली रहनेछ भने तराई क्षेत्रमा आंशिक बदली हुनेछ। कोशी प्रदेशलगायत देशका पहाडी र हिमाली भागका केही स्थान तथा बाँकी भू–भागका थोरै स्थानमा मेघगर्जन, चट्याङ, हुरीबतास र असिनासहित हल्कादेखि मध्यम वर्षाको सम्भावना रहेको छ। साथै, उच्च हिमाली क्षेत्रका केही स्थानमा हिमपात हुन सक्ने पूर्वानुमान गरिएको छ।

आज राति कोशी प्रदेश र देशका उच्च हिमाली भू–भागमा साधारणतया बदली रहनेछ। पहाडी भेगमा आंशिक बदली रहने भए तापनि तराईको मौसम भने मुख्यतया सफा रहने महाशाखाले जनाएको छ। कोशी, बागमती, गण्डकी र कर्णाली प्रदेशका हिमाली क्षेत्रका एक–दुई स्थानमा राति पनि मेघगर्जन र चट्याङसहित हल्का वर्षा र हिमपातको सम्भावना रहेको छ।

वर्षा, चट्याङ, हुरीबतास र असिनाको जोखिम रहेका क्षेत्रका सर्वसाधारणलाई आवश्यक सतर्कता अपनाउन र मौसममा आउने परिवर्तनप्रति सचेत रहन विभागले विशेष अनुरोध गरेको छ।