सगरमाथाको शिखरमा फेरि चम्किए कामीरिता र लाक्पा: ३२औँ पटकको आरोहणसँगै कामीरिताको नयाँ विश्वकीर्तिमान

काठमाडौँ, ३ जेठ । विश्वको सर्वोच्च शिखर सगरमाथाको आरोहणमा नेपाली पर्वतारोहीहरूले आइतबार दुईवटा ठूला विश्वकीर्तिमान कायम गरेका छन्। कीर्तिमानी आरोही कामीरिता शेर्पा ३२औँ पटक सगरमाथाको चुचुरोमा पुग्न सफल भएका छन् भने लाक्पा शेर्पाले महिलातर्फ ११औँ पटक आरोहण गरी आफ्नै कीर्तिमान सुधार गरेकी छिन्।

पर्यटन विभागको सगरमाथा आधार शिविरस्थित अस्थायी कार्यालयका अनुसार, ५४ वर्षीय कामीरिताले आइतबार बिहान १०:१२ बजे सगरमाथाको सफल आरोहण गरेका हुन्। यो सँगै उनले सगरमाथा आरोहणमा आफ्नै नाममा रहेको ३१ पटकको रेकर्ड तोड्दै नयाँ इतिहास रचेका छन्। सन् १९९४ मा पहिलोपटक सगरमाथाको चुचुरोमा पाइला टेकेका कामीरिताले विगत तीन दशकदेखि निरन्तर हिमाल आरोहण गर्दै आएका छन्।

त्यसैगरी, ‘माउन्टेन क्विन’ उपनामले परिचित लाक्पा शेर्पाले आइतबार बिहान ९:३० बजे ११औँ पटक सगरमाथाको सफल आरोहण गरेकी छिन्। योसँगै उनी विश्वमै सबैभन्दा धेरै पटक सगरमाथा आरोहण गर्ने महिला आरोही बनेकी छिन्। सन् १९७३ मा सङ्खुवासभाको मकालु–२ मा जन्मिएकी लाक्पाले यसअघि १० पटक सगरमाथा चढेर आफ्नै नाममा विश्वकीर्तिमान कायम गरिसकेकी थिइन्।
पर्यटन विभागले दुवै कीर्तिमानी आरोहीलाई यो ऐतिहासिक सफलताका लागि बधाई दिएको छ। सगरमाथाको चालु वसन्तकालीन आरोहणका क्रममा एकैदिन दुई ठूला कीर्तिमान कायम हुनुलाई नेपाली पर्वतारोहण इतिहासको गौरवपूर्ण उपलब्धिका रूपमा हेरिएको छ।