हलिउड / लस एन्जलस — हलिउडमा एसियाली प्रतिनिधित्वका लागि ऐतिहासिक फड्को मारेको बहुचर्चित ब्लकबस्टर चलचित्र ‘क्रेजी रिच एसियन्स’ अब नयाँ रूपमा दर्शकमाझ आउने भएको छ। प्रदर्शन भएको आठ वर्षपछि यो सांस्कृतिक रूपमा समेत प्रभाव छाड्न सफल चलचित्र अब स्ट्रिमिङ प्लेटफर्म एचबीओ म्याक्स  मा नयाँ टेलिभिजन सिरिजका रूपमा फर्किने भएको छ।

एचबीओ म्याक्सले सामाजिक सञ्जालमार्फत दिएको जानकारी अनुसार यस सिरिजमा मिचेल यो , कन्स्टान्स वु  र हेन्री गोल्डेन  लगायतका मूल चलचित्रका प्रमुख कलाकारहरूले नै आफ्ना पुराना भूमिकाहरूलाई निरन्तरता दिनेछन्। इन्स्टाग्राममा पोष्ट गर्दै एचबीओ म्याक्सले लेखेको छ, “मात्र धनी होइन—क्रेजी रिच!” साथै, यस सिरिजको उत्पादन सन् २०२७ देखि सुरु हुने जनाइएको छ। सीएनएन जस्तै एचबीओ म्याक्स पनि स्काइडान्स को स्वामित्वमा रहेको छ।

हलिउडमा समावेशीकरणको एउटा ऐतिहासिक मोड

सन् २०१८ मा पहिलो पटक हलमा प्रदर्शन हुँदा यो रोमान्टिक कमेडी चलचित्र हलिउडमा समावेशीकरणको पक्षमा एक ठूलो कोसेढुङ्गा साबित भएको थियो। दुई दशकभन्दा बढी समयपछि हलिउडको कुनै ठूलो चलचित्रमा सम्पूर्ण कलाकारहरू एसियाली मूलका रहेका थिए। बक्स अफिसमा अभूतपूर्व सफलता हात पार्दै यसले विश्वव्यापी रूपमा २३० मिलियन डलरभन्दा बढी कमाइ गरेको थियो र समीक्षकहरूबाट समेत उच्च प्रशंसा बटुलेको थियो।

धेरै एसियाली समुदायका लागि यो चलचित्र सांस्कृतिक गर्वको स्रोत बन्यो, जसले यस समुदायको विविधता, प्रभाव र बढ्दो पहिचानलाई विश्वमञ्चमा दुर्लभ स्थान दियो।

चलचित्रका निर्देशक जोन एम. चु  ले आफ्नो इन्स्टाग्राम स्टोरीमा लेख्नुभएको छ, “आठ वर्षअघि ‘क्रेजी रिच एसियन्स’ ले मेरो जीवन नै बदलियो। महजोंग रात्रिदेखि लिएर यसलाई सर्वोत्कृष्ट इन–फ्लाइट चलचित्र  बनाउनेसम्मका दर्शकहरूको साथ हेर्नु अद्भुत थियो। अब यसपछिको श्रृंखलामा के आउँदैछ भनेर सेयर गर्न म अत्यन्तै उत्साहित छु। अन्ततः, विगत आठ वर्षदेखि मलाई दैनिकजसो सोधिने प्रश्नको जवाफ दिने समय आएको छ: ‘हामीले सिक्वेल कहिले पाइरहेका छौँ?'”

के छ कथा र कलाकारहरूको पृष्ठभूमिमा?

केभिन क्वान  को उपन्यासमा आधारित यस चलचित्रले न्युयोर्ककी अर्थशास्त्रकी प्राध्यापक रेचेल चु (वु) को कथा समेट्छ, जो आफ्ना प्रेमी निकोलस यंग (गोल्डेन) सँग सिंगापुर पुग्दा विलासिता र चहकयुक्त दुनियाँमा प्रवेश गर्छिन्। सिंगापुरका सर्वाधिक धनी परिवारका उत्तराधिकारी निक ले आफ्ना मिल्ने साथीको विवाहमा सहभागी हुन रेचेललाई घर लैजान्छन्, जहाँ उनले निककी कडा स्वभावकी आमा इलिनोर (यो) को मन जित्नुपर्ने हुन्छ। यसैक्रममा उनले निकका अनौठा परिवारका सदस्य र साथीहरूलाई भेट्छिन्, जसमध्ये केहीले उनको रोमान्समा सहयोग गर्छन् भने केहीले तगारो हाल्ने प्रयास गर्छन्।

यस सिरिजमा रोनी चिएङ  ले पनि हङकङबाट आएका निकका हैसियतवादी चचेरा भाइ एडिसन “एडी” चेङको रूपमा आफ्नो भूमिकालाई निरन्तरता दिने एचबीओ म्याक्सले जनाएको छ। यसअघिको चलचित्रमा केन जेउङ, अक्वाफिना र गेम्मा चानलगायतका कलाकारहरूको पनि अभिनय रहेको थियो।

आठ एपिसोडको ‘क्रेजी रिच मजिक’

सन् २०१८ को चलचित्रका सह–लेखिका समेत रहेकी एडेल लिमले इन्स्टाग्राममा खुसी व्यक्त गर्दै लेख्नुभएको छ, “अन्ततः हामी संसारले प्रतिक्षा गरिरहेको सिक्वेल बनाउँदैछौँ, तर एउटा मात्र चलचित्रको सट्टा हामीसँग ‘क्रेजी रिच मजिक’ का आठ वटा एपिसोड हुनेछन्।”

क्वानका उपन्यासहरू—सन् २०१३ मा प्रकाशित ‘क्रेजी रिच एसियन्स’, त्यसको दुई वर्षपछि ‘चाइना रिच गर्लफ्रेन्ड’ र सन् २०१७ मा ‘रिच पिपल प्रब्लम्स’—का आधारमा यो नयाँ सिरिजमा थप सामग्री समेटिने अपेक्षा गरिएको छ। हलिउडमा ‘ह्इटवाशिङ’ (श्वेत वर्णका कलाकारलाई मात्र प्राथमिकता दिने प्रवृत्ति) को चर्को आलोचना भइरहेको समयमा यो चलचित्र आएको थियो। निर्देशक जोन एम. चुले यसअघि नै हलिउडमा हुने यस्ता विभेदकारी सोच र विश्वव्यापी बजारलाई देखाएर मुख्य भूमिकामा एसियाली अभिनेताहरूलाई रोक्ने प्रवृत्तिविरुद्ध कसरी संघर्ष गर्नुपरkयो भन्ने अनुभव सीएनएनसँग साट्नुभएको थियो।