वासिङ्टन डीसी/न्युयोर्क (एजेन्सी) ।  फिफा विश्वकप २०२६ को चौथो दिन आज आइतबार फुटबल जगतको ध्यान नेदरल्यान्ड्स र जापानबीचको रोमाञ्चक भिडन्तमा केन्द्रित हुने भएको छ। यसका साथै, आजको दिन विश्वकप इतिहासमा एक नयाँ कीर्तिमान पनि कायम हुनेछ।

नेदरल्यान्ड्स र जापान: समूह ‘एफ’ को बहुप्रतिक्षित खेल
तीन पटकको उपविजेता नेदरल्यान्ड्स र एसियाली पावरहाउस जापानबीचको खेललाई समूह चरणकै उत्कृष्ट ५ खेलमध्ये एक मानिएको छ। गत विश्वकपमा जर्मनी र स्पेन जस्ता महारथीलाई हराएको जापान यस पटक पनि ठूलो ‘अपसेट’ गर्ने दाउमा छ।

नेदरल्यान्ड्सका प्रशिक्षक रोनाल्ड कोम्यानले आफ्ना खेलाडीहरूमाथि उपाधि जित्ने ठूलो दबाब रहेको स्वीकार गरेका छन्। उनले भने, “हामीमाथि धेरै दबाब छ, तर हामी एक पटकमा एउटा खेलमा मात्र ध्यान केन्द्रित गर्न चाहन्छौँ। जापान विरुद्धको खेल हाम्रा लागि चुनौतीपूर्ण हुनेछ।”

भर्जिल भान डाइक र कोडी गाक्पो जस्ता स्टार खेलाडीले भरिएको डच टोली विरुद्ध जापानका ताकेफुसा कुबो र जुन्या इतोको प्रदर्शन रोचक हुनेछ। अप्टाको सुपर कम्प्युटरका अनुसार यस खेलमा नेदरल्यान्ड्सको जित्ने सम्भावना ५०.२ प्रतिशत छ भने जापानको २४.५ प्रतिशत छ।

इतिहास रच्दै सानो राष्ट्र क्युरासाओ
आजको अर्को मुख्य आकर्षण क्युरासाओ र जर्मनीबीचको खेल हो। करिब १ लाख ५० हजार मात्र जनसंख्या भएको क्यारिबियन टापु राष्ट्र क्युरासाओ विश्वकप खेल्ने इतिहासकै सबैभन्दा सानो देश बन्दैछ।

जर्मनी विरुद्धको खेल अघि क्युरासाओका प्रशिक्षक डिक एड्भोकेटले भने, “हामी जर्मनीको तुलनामा निकै साना छौँ, तर हामी उनीहरूलाई कडा टक्कर दिनेछौँ। हामीसँग गुमाउनु केही छैन।” ७८ वर्षीय एड्भोकेट विश्वकप इतिहासकै सबैभन्दा पाको प्रशिक्षक समेत बन्दैछन्। तथ्याङ्क अनुसार यो खेल जर्मनीले जित्ने सम्भावना ९०.७ प्रतिशत रहेको छ।

इक्वेडर र आइभोरी कोस्टबीच प्रतिस्पर्धा
आजै हुने अर्को खेलमा इक्वेडर र आइभोरी कोस्ट भिड्दैछन्। यी दुवै टोलीलाई प्रतियोगिताको ‘डार्क हर्स’ (अप्रत्याशित नतिजा निकाल्न सक्ने टोली) मानिएको छ। प्रक्षेपण अनुसार आइभोरी कोस्टको जित्ने सम्भावना ३७.५ प्रतिशत र इक्वेडरको ३५.२ प्रतिशत रहेको छ, जसले यो खेल निकै प्रतिस्पर्धात्मक हुने संकेत गर्दछ।

बास्केटबलको छायामा विश्वकपको रौनक
न्युयोर्कमा विश्वकपको माहोल तातिरहेका बेला स्थानीय बास्केटबल टोली ‘न्युयोर्क निक्स’ ले ५३ वर्षपछि एनबीए (NBA) को उपाधि जितेपछि फुटबलको चर्चा केही ओझेलमा परेको छ। शनिबार न्युयोर्कमा ब्राजिल र मोरक्कोको खेल भइरहँदा शहरका सडकहरूमा भने बास्केटबल प्रेमीहरूको उत्सव देखिएको थियो।