अन्तिम मिनेटमा अमादको निर्णायक गोल, आइभरीकोस्टले इक्वेडरलाई १–० ले हरायो
काठमाडौँ, असार १ गते। फिफा विश्वकप २०२६ अन्तर्गत समूह ‘ई’ को रोमाञ्चक प्रतिस्पर्धामा आइभरीकोस्टले अन्तिम मिनेटमा गरेको गोलको मद्दतले इक्वेडरलाई १–० ले पराजित गरेको छ।
निकै प्रतिस्पर्धात्मक र रोमाञ्चक बनेको खेलमा दुवै टोलीले गोलका थुप्रै अवसर सिर्जना गरेका थिए। तर खेलभर गोलरक्षक र पोस्ट बाधक बनेपछि खेल गोलरहित बराबरीतर्फ उन्मुख देखिएको थियो।
पहिलो हाफमा इक्वेडरका जोन येबोआह र एलन मिन्डाको प्रहार क्रसबारमा लागेर फर्किएको थियो। दोस्रो हाफमा कप्तान एनेर भ्यालेन्सियाको शक्तिशाली प्रहार पनि पोस्टमा लागेपछि इक्वेडर अग्रता लिनबाट चुकेको थियो।
आइभरीकोस्टले पनि केही उत्कृष्ट अवसर बनाएको थियो। एलिये वाहीको पहिलो टचमै गरेको प्रहार क्रसबारमा लाग्दा टोली गोलबाट वञ्चित बनेको थियो। खेलको उत्तरार्धमा बल नियन्त्रणमा प्रभुत्व जमाएको आइभरीकोस्टले लगातार दबाब सिर्जना गरिरह्यो।
अन्ततः खेलको ९०औँ मिनेटमा वैकल्पिक खेलाडी अमाद डियालोले उत्कृष्ट फिनिस गर्दै बललाई जाली चुमाएपछि आइभरीकोस्टले महत्वपूर्ण जित हात पार्यो। अमादको गोलसँगै रंगशालामा उपस्थित समर्थकहरू खुसीले उत्साहित बनेका थिए।
यस जितसँगै आइभरीकोस्ट समूह ‘ई’ को शीर्ष स्थानमा उक्लिएको छ भने इक्वेडरले हारसँगै समूह चरणको यात्रा थप चुनौतीपूर्ण बनाएको छ।
