विश्वकपमा अल्जेरियाको पुनरागमन जित, जोर्डन प्रतियोगिताबाट बाहिरियो
काठमाडौँ, ९ असार । अल्जेरियाले फिफा विश्वकप २०२६ अन्तर्गत समूह ‘जे’ को खेलमा जोर्डनलाई २–१ ले पराजित गर्दै अन्तिम चरणमा पुग्ने आशा जीवित राखेको छ। यस हारसँगै पहिलोपटक विश्वकप खेलेको जोर्डन भने दुई खेलमै प्रतियोगिताबाट बाहिरिएको छ।
दुवै टोली पहिलो खेलमा पराजित भएकाले जितको खोजीमा मैदान उत्रिएका थिए। खेलको सुरुआती समय बराबरीको प्रतिस्पर्धामा बिते पनि जोर्डनले ३६औँ मिनेटमा अग्रता लियो। मुसा अल तमारीको पासमा निजार अल रशदानले आकर्षक गोल गर्दै टोलीलाई १–० को अवस्थामा पुर्याएका थिए।
पहिलो हाफमा पछि परेको अल्जेरियाले दोस्रो हाफमा उत्कृष्ट पुनरागमन गर्यो। ६९औँ मिनेटमा नधिर बेनबोउलीले कर्नर प्रहारबाट हेडमार्फत गोल गर्दै खेल १–१ को बराबरीमा ल्याए।
त्यसपछि ८२औँ मिनेटमा अर्को कर्नरबाट सिर्जित अवसरलाई अमिन गुइरीले नजिकैबाट गोलमा परिणत गर्दै अल्जेरियालाई २–१ को महत्वपूर्ण जित दिलाए।
यस जितसँगै अल्जेरियाले नकआउट चरणमा पुग्ने सम्भावना कायम राखेको छ भने जोर्डनको विश्वकप यात्रा समूह चरणमै समाप्त भएको छ।
खेलमा अल्जेरियाका इब्राहिम माजालाई ‘सुपेरियर प्लेयर अफ द म्याच’ घोषित गरियो।
मुख्य तथ्य:
अल्जेरियाले विश्वकप इतिहासका १५ खेलमध्ये केवल एक खेलमा मात्र क्लिनसिट राख्न सफल भएको छ। सन् २०१० मा इङ्ग्ल्यान्डसँगको गोलरहित बराबरी त्यसको एकमात्र उदाहरण हो।
