फिफा विश्वकप २०२६:फिफा विश्वकप २०२६: इराकमाथि सेनेगलको ५–० को सानदार जित
काठमाडौं । फिफा विश्वकप २०२६ अन्तर्गत समूह चरणको खेलमा अफ्रिकी राष्ट्र सेनेगलले इराकमाथि ५–० गोलअन्तरको फराकिलो र सनसनीपूर्ण जित दर्ता गरेको छ । यो जितसँगै सेनेगलले प्रतियोगिताको नकआउट चरण (अन्तिम ३२) मा पुग्ने आफ्नो सम्भावनालाई निकै बलियो बनाएको छ ।
खेलको विवरण: दोस्रो हाफमा गोलको वर्षा
खेलको सुरुवातमै आक्रामक रणनीति अपनाएको सेनेगलका लागि चौथो मिनेटमै हबिब डियराले गोल गर्दै टोलीलाई सुरुवाती अग्रता दिलाएका थिए । डियराको गोलपछि खेलको पहिलो हाफ र दोस्रो हाफको सुरुवाती १० मिनेटसम्म इराकले सेनेगललाई थप गोल गर्नबाट रोकेको थियो ।
तर, ५६ औं मिनेटमा इस्माइला सारले गोल गरेपछि इराकको रक्षापंक्ति धराशयी बन्यो । त्यसको लगत्तै ५९ औं मिनेटमा पापे गुइएले व्यक्तिगत पहिलो र टोलीका लागि तेस्रो गोल गरे । गुइएले नै ७१ औं मिनेटमा पुनः अर्को गोल थप्दै सेनेगललाई ४–० को सुरक्षित स्थितिमा पुर्याए । खेलको अन्त्यतिर ८२ औं मिनेटमा इलिमान एनडिएले पाँचौं गोल गर्दै सेनेगलको फराकिलो जित सुनिश्चित गरे ।
बनायो ऐतिहासिक कीर्तिमान
यो जितसँगै सेनेगलले विश्वकपको इतिहासमा एउटा नयाँ कीर्तिमान समेत कायम गरेको छ । विश्वकपको एउटै खेलमा ५ गोल प्रहार गर्ने सेनेगल पहिलो अफ्रिकी राष्ट्र बनेको छ । यसअघि कुनै पनि अफ्रिकी टोलीले विश्वकपको एउटै खेलमा यति ठूलो गोलअन्तर निकाल्न सकेका थिएनन् ।
तालिकाको अंक गणित र सम्भावना
समूह ‘आई’ मा रहेको सेनेगलले ३ खेलबाट ३ अंक जोडेको छ । यो जितपछि सेनेगल अंक तालिकाको तेस्रो स्थानमा उक्लिएको छ । फराकिलो अन्तरको जितले सेनेगलको ‘गोल डिफरेन्स’ (गोलअन्तर) मा निकै सुधार आएको छ ।
यस जितसँगै सेनेगल तेस्रो स्थानमा रहने उत्कृष्ट ८ टोलीभित्र पर्दै नकआउट चरणमा प्रवेश गर्ने प्रवल सम्भावना देखिएको छ । यद्यपि, आधिकारिक रुपमा छनोट हुनका लागि सेनेगलले अन्य समूहका खेलहरूको अन्तिम नतिजा कुर्नुपर्नेछ ।
इराकका लागि भने यो हार निकै महँगो सावित भएको छ । सेनेगलको तीब्र गतिको खेल र सटिक फिनिसिङ अगाडि इराकी डिफेन्डरहरू निरिह देखिएका थिए ।
