एसईई ग्रेडवृद्धि परीक्षाको नतिजा सार्वजनिक: ६४.६९ प्रतिशत विद्यार्थी उत्तीर्ण

काठमाडौँ, २३ असार । राष्ट्रिय परीक्षा बोर्डले माध्यमिक शिक्षा परीक्षा (एसईई) २०८२ को ग्रेडवृद्धि (पूरक) परीक्षाको नतिजा सार्वजनिक गरेको छ। बोर्डका अनुसार परीक्षामा सहभागी कुल १ लाख २९ हजार ११४ जना विद्यार्थीमध्ये ८३ हजार ५२३ जना (६४.६९ प्रतिशत) उत्तीर्ण भएका छन्।

सार्वजनिक नतिजाको जीपीए विवरण अनुसार सबैभन्दा धेरै ५१ हजार ४३८ जना विद्यार्थीले २.४० देखि २.८० सम्मको जीपीए (GPA) प्राप्त गरेका छन्। यसैगरी, १६ हजार ४६७ जनाले २.८० देखि ३.२० जीपीए, १४ हजार ३६२ जनाले २.०० देखि २.४० जीपीए, १ हजार १९५ जनाले ३.२० देखि ३.६० जीपीए र ४५ जनाले १.६० देखि २.०० जीपीए हासिल गरेका छन्।

सबैभन्दा उच्च जीपीए अर्थात् ३.६० देखि ४.०० हासिल गर्ने विद्यार्थीको सङ्ख्या १६ जना रहेको छ भने १.६० भन्दा कम जीपीए ल्याउने विद्यार्थी यस पटक कोही पनि छैनन्।

परीक्षार्थीहरूले बोर्डको आधिकारिक वेबसाइट, आईभीआर (IVR) तथा एसएमएस र यूएसएसडी (SMS/USSD) सेवामार्फत आफ्नो नतिजा हेर्न सक्नेछन्। सार्वजनिक नतिजामा चित्त नबुझेमा पुनर्योग (Re-totaling) का लागि बोर्डले तोकेको समयसीमाभित्र अनलाइनमार्फत आवेदन दिन सकिने व्यवस्था गरिएको छ।

यसैबीच, परीक्षाका क्रममा मर्यादा विपरीत कार्य गरेको आरोपमा केन्द्राध्यक्षको सिफारिसका आधारमा ७ जना परीक्षार्थीहरूको परीक्षा रद्द गरिएको बोर्डले जनाएको छ।