एसिसी प्रिमियर कप आजदेखि : नेपालले पहिलोपटक बहराइनसँग प्रतिस्पर्धा गर्दै

काठमाडौँ, १५ भदौ । तेस्रो संस्करणको एसिसी प्रिमियर कप क्रिकेट प्रतियोगितामा आज नेपालले आफ्नो पहिलो खेल खेल्दैछ । मलेसियाको बाङ्गीस्थित वाईएसडी–यूकेएम ओभल मैदानमा हुने यस खेलमा नेपालले बहराइनको सामना गर्नेछ । खेल नेपाली समयअनुसार बिहान ७:१५ बजे सुरु हुने तालिका छ ।

एकदिवसीय क्रिकेटको इतिहासमा नेपाल र बहराइन पहिलोपटक एकअर्काविरुद्ध भिड्न लागेका हुन् । प्रतियोगिताको बलियो दाबेदार मानिएको नेपाल पहिलो खेलमै बहराइनलाई स्तब्ध पार्दै सुखद सुरुआत गर्ने लक्ष्यका साथ मैदान उत्रनेछ ।

प्रतियोगितामा सहभागी १० टोलीलाई दुई समूहमा विभाजन गरिएको छ । एउटा समूहबाट शीर्ष दुई टोलीले मात्र सेमिफाइनलमा स्थान बनाउने भएकाले नेपालका लागि समूह चरणका चारवटै खेलहरू उत्तिकै महत्वपूर्ण छन् ।

नेपाली राष्ट्रिय टोलीका पूर्वक्रिकेटर शरद भेषवाकरले यस प्रतियोगितामा कुनै पनि टोलीलाई कमजोर आँक्न नहुने बताउनुभएको छ । “एसिसी प्रिमियर कपका सबै १० टोली राम्रा छन् । हामीले बहराइनलाई हल्का प्रतिद्वन्द्वीका रूपमा लिनु हुँदैन,” उहाँले भन्नुभयो, “नेपाली टोलीको अहिलेको लय र तयारी हेर्दा म यसपटक नेपालले उपाधि जित्नेमा आशावादी छु ।”

प्रतियोगिताअघि नेपालले मलेसियाविरुद्ध खेलेका दुई अभ्यास खेलमा लगातार जित निकालेको थियो । पहिलो खेलमा सानदार ब्याटिङ प्रदर्शन गरेको नेपालले दोस्रो खेलमा भने कसिलो बलिङको मद्दतले मलेसियालाई २७ रनले पराजित गरेको थियो । अभ्यास खेलको यही सफलतालाई नेपालले आजको खेलमा पनि निरन्तरता दिन चाहन्छ ।

सन्दीप लामिछानेको कप्तानीमा रहेको नेपाली टोलीमा आसिफ शेख, अर्जुन कुमाल, देव खनाल, रोहितकुमार पौडेल, दीपेन्द्रसिंह ऐरी, बसिर अहमद, सन्दीप जोरा, ईशान पाण्डे, गुलशनकुमार झा, ललितनारायण राजवंशी, करण केसी, हेमन्त धामी र शेर मल्ल रहेका छन् ।