काठमाडौँ, १५ कात्तिक । आकारमा अत्यन्तै साना, तर संख्यामा अकल्पनीय रूपमा विशाल जीव हुन् कमिला। घरको भान्छादेखि घना जंगल, मरुभूमि, पहाड र जमिनमुनिका सुरुङसम्म फैलिएका कमिलाले पृथ्वीका अधिकांश स्थलीय पारिस्थितिक प्रणालीमा आफ्नो उपस्थिति जनाएका छन्। सामान्यतया मानिसले कमिलालाई घरमा देखिने साना कीरा वा खानेकुरा बोक्ने जीवका रूपमा मात्र बुझ्ने गर्छन्। तर वैज्ञानिक अध्ययनहरूले यी साना जीवको संख्या, कुल जैवभार र वातावरणीय योगदान निकै ठूलो रहेको देखाएका छन्।