कर्णाली, २१ भदौ ।  रसुवाको भोटेकोशीमा यही भदौ १० गते गएको बाढीका कारण कर्णाली प्रदेशका अझै १६८ व्यक्तिको अवस्था अझै अज्ञात रहेको छ । भोटेकोशी बाढीमा परेर कर्णाली प्रदेशका १० जिल्लाका २४८ जना सम्पर्कविहीन भएकामध्ये ७८ जना सम्पर्कमा आएको कर्णाली प्रदेश प्रहरी कार्यालय सुर्खेतका प्रवक्ता एवं प्रहरी वरिष्ठ उपरीक्षक सन्तोषसिंह राठौरले जानकारी दिनुभयो । बाढीबाट दुई जनाको मृत्यु भएको उहाँले बताउनुभयो । मृत्यु हुनेमा हुम्लाको ताजाकोट गाउँपालिका–२ का नहकुल शर्मा हुन् । उहाँ रसुवा भन्सार कार्यालयका अधिकृत हुनुहुन्थ्यो ।

 

गोरखामा शव भेटिएका शर्माको काठमाडौँ पशुपति आर्यघाटमा दाहसंस्कार गरिएको छ । त्यस्तै, सल्यानको बागचौर नगरपालिका–१० पीपलनेटाका २० वर्षीय आयुष खड्काको पनि बाढीबाट मृत्यु भएको छ । प्लान्ट क्वारेन्टाइन टिमुरेमा खरिदार पदमा कार्यरत उहाँको चितवन देवघाटमा दाहसंस्कार गरिएको छ । कर्णाली प्रदेश प्रहरीले उपलब्ध गराएको विवरणअनुसार अज्ञात अवस्थामा हुनेमा सबैभन्दा धेरै जुम्लाका ६३ जना छन् ।

 

यस्तै सल्यानका ५१, सुर्खेतका १५, मुगुका ११, रुकुम पश्चिमका सात, हुम्ला र कालीकोटका छ÷छ, दैलेखका पाँच तथा जाजरकोट र डोल्पाका दुई÷दुई जनाको अवस्था अज्ञात रहेको प्रहरी वरिष्ठ उपरीक्षक राठौरले बताउनुभयो । अज्ञात अवस्था रहेकामा १३४ पुरुष, २६ महिला तथा आठ बालबालिका रहेका छन् ।