बाँकेमा ६०७ हेक्टरभन्दा बढी वनक्षेत्र अतिक्रमणमा, झण्डै चार हजार घरटहरा निर्माण

बाँके, ३० भदौ । बाँकेमा आर्थिक वर्ष २०८२/८३ सम्ममा ६०७ हेक्टरभन्दा बढी वनक्षेत्र अतिक्रमणमा परेको छ। अतिक्रमित वनक्षेत्रमा हालसम्म करिब तीन हजार ९९० घरटहरा निर्माण भइसकेका छन्।

डिभिजन वन कार्यालय बाँकेका सूचना अधिकारी टङ्क गुरुङका अनुसार जिल्लामा हालसम्म ६०७ दशमलव ९८ हेक्टर वनक्षेत्र अतिक्रमणमा परेको छ। उनका अनुसार अतिक्रमणको ठूलो हिस्सा विगतमा बाढीबाट विस्थापित परिवारसँग जोडिएको छ।

नरैनापुर गाउँपालिकामा मात्रै २७३ हेक्टर वनक्षेत्र अतिक्रमण गरी ९७५ घरधुरी बसोबास गरिरहेका छन्। तत्कालीन समयमा बाढीपीडितलाई बस्न दिइएको क्षेत्रमा अतिक्रमण हटाउने प्रयास भए पनि पुनः बाढी आएपछि विस्थापित परिवार फर्केर बस्न थालेका गुरुङले जानकारी दिए।

विसं २०६६ र त्यसपछिको बाढीबाट प्रभावित परिवारलाई तत्कालीन अवस्थामा बसोबासका लागि दिइएको वनक्षेत्र व्यवस्थित हुन नसक्दा समस्या बढ्दै गएको छ। २०७४ सालको बाढीपछि पनि त्यस्ता परिवार पुनः वनक्षेत्रमा आएर बसोबास गर्न थालेका छन्।

सूचना अधिकारी गुरुङका अनुसार राप्तीसोनारी गाउँपालिकाको वडा नं ५, ६ र ७ मा २११ हेक्टर वनक्षेत्र अतिक्रमण गरी एक हजार ९२५ घरधुरीले बसोबास तथा खेतीपाती गर्दै आएका छन्। वडा नं २ मा ३२ दशमलव ९८ हेक्टर वनक्षेत्र अतिक्रमण गरी ६०४ घरटहरा निर्माण गरिएको छ भने वडा नं १, ३ र ४ मा ४१ हेक्टर वनक्षेत्र अतिक्रमण गरी ७२ घरधुरी बसोबास गरिरहेको पाइएको छ।

कोहलपुर नगरपालिका वडा नं ७, ८ र १२ तथा बैजनाथ गाउँपालिका–२ मा पनि वनक्षेत्र अतिक्रमण भएको छ। ती क्षेत्रमा २०४४/४५ देखि २०७१/७२ सम्म गैरबाढीपीडितका २० घरटहरा निर्माण भए पनि हाल त्यहाँ नियमित बसोबास नरहेको र सात जनाले मात्र खेतीपाती गर्दै आएको गुरुङले बताए।

त्यस्तै, डुडुवा गाउँपालिका–१ बाहेक अन्य वडा र नेपालगञ्जका विभिन्न क्षेत्रमा समेत वनक्षेत्रमा ३९४ घरटहरा निर्माण भएको छ। बाँकेमा भएको अधिकांश वन अतिक्रमण २०७५ सालअघि नै भएको हो। वन अतिक्रमण हटाउन चालु आर्थिक वर्षमा योजना बनाई अगाडि बढ्ने सूचना अधिकारी गुरुङले जानकारी दिए।