काठमाडौं, १२ असाेज। राष्ट्रिय सभा सदस्य आनन्दप्रसाद ढुंगानाले पूर्वप्रधानन्यायाधीश चोलेन्द्र शमशेर जबरालाई मध्यरातमा नियन्त्रणमा लिइएको घटनाप्रति आपत्ति जनाउँदै सरकारको कार्यशैलीमाथि प्रश्न उठाएका छन् ।

सोमबार राष्ट्रिय सभा बैठकमा बोल्दै सांसद ढुंगानाले जबरालाई बिनापुर्जी र मध्यरातमा नियन्त्रणमा लिइएको घटनालाई पञ्चायतकालको स्मरण गराउने भन्दै सरकार निरंकुश शैलीमा अघि बढेको आरोप लगाए ।

उनले कानूनको शासनको उपहास भइरहेको दाबी गर्दै जबराको नियन्त्रणमा लिने घटनालगायत समसामयिक विषयमा प्रधानमन्त्री र गृहमन्त्रीले संसद्मा जवाफ दिनुपर्ने माग गरे ।

‘हिजो पञ्चायतकालमा सिभिल ड्रेसमा आएर बिना जानकारी गिरफ्तारी हुन्थ्यो, आज लोकतन्त्रमा पनि त्यस्तै अवस्था देखिनु चिन्ताजनक छ,’ ढुंगानाले भने, ‘दुई तिहाइको दम्भमा सरकारले स्वेच्छाचारी निर्णय लिइरहेको छ ।’ उनले कुनै पनि घटनाबारे संसद्लाई जानकारी गराउनु र जनताप्रति उत्तरदायी हुनु सरकारको संवैधानिक दायित्व भएको बताए ।

जबरालाई आइतबार बिहान महाराजगञ्जस्थित निवासबाट प्रहरीले नियन्त्रणमा लिएको थियो । प्रहरीले उनलाई सुरक्षा जोखिम रहेको सूचनाका आधारमा सुरक्षित स्थानमा लैजानुपरेको बताएको थियो । करिब १२ घण्टापछि उनलाई आफन्तको जिम्मा लगाइएको थियो ।